Prezidente Konsellu Veteranu, Vidal de Jesus 'Riak Leman'. Imajen Tatoli/ Egas Cristóvão

DILI, 19 agostu 2020 (TATOLI)—Prezidente Konsellu Veteranu, Vidal de Jesus “Riak Leman”, informa veteranu Timor-Leste ne’ebé luta no halo funu durante tinan 24 nia laran ne’e hamutuk na’in-98 de’it, ne’ebé estadu Timor-Leste bele halo uma no tenke fó pensaun vitalísia ba sira.

Notísia Relevante: Aniceto Guterres: “Governu mak tenke define prioridade hodi valoriza funu-na’in sira”

Riak Leman hateten, kestaun ida-ne’e Konsellu Veteranu ne’ebé nia lidera halo ona proposta ba Ministériu Asuntu Kombatente Libertasaun Nasionál (MAKLN) hodi bele aprezenta ba Konsellu Ministru no Parlamentu Nasionál bainhira Orsamentu Jerál Estadu (OJE) 2020-2021 iha ona ne’e bele implementa.

“Veteranu Timor-Leste ne’ebé luta no halo funu durante tinan 24 nia laran ne’e hamutuk na’in-98 de’it, ne’ebé estadu Timor-Leste bele halo uma no tenke fó pensaun vitalísia ba sira. Agora, iha ami-nia proposta ne’e, ami tau ona pensaun vitalísia ba kada Veteranu ida sei hetan ninia direitu $2,500 liuliu veteranu sira ne’ebé mak luta durante tinan 24 iha ai-laran no mós inklui veteranu sira ne’ebé hetan ka simu torturasaun makaas,” dehan Veteranu Vidal de Jesus “Riak leman” ba Agência TATOLI iha ámbitu komemorasaun loron FALINTIL ba dala-15 (20 Agostu 1975-20 agostu 2020) ne’ebé sei selebra iha 20 agostu tinan ne’e, liuhosi telefonika, kuarta ne’e.

Tanba, Riak Leman hatutan, veteranu sira ne’ebé luta ba funu durante tinan 24 nia laran ne’e mak ohin loron Timor-Leste bele selebra tan loron FALINTIL ba dala-45, entaun ho nune’e veteranu sira ne’e iha direitu atu hetan pensaun vitalísia.

Veteranu ne’e hateten, sai hanesan injustisa boot ida se deputadu/a sira servisu de’it tinan lima hetan ona pensaun vitalísia maibé veteranu sira ne’ebé halo funu durante tinan 24 nia laran ne’e, seidauk no labele hetan ka simu pensaun vitalísia.

“Se deputadu/a sira servisu tinan lima de’it mak simu pensaun vitalísia, ha’u hanoin ida-ne’e hanesan injustisa boot ba veteranu sira ne’ebé luta durante tinan 24 nia laran no injustisa boot ba nasaun Timor-Leste,” Prezidente Konsellu Veteranu, Riak Leman, hateten.

Tanba ne’e, Veteranu Riak Leman husu ba Estadu no Governu Timor-Leste tenke tau-matan ba veteranu sira luta durante tinan 24 nia laran ne’e, hodi bele hetan netik pensaun vitalísia ruma hanesan deputadu/a sira hetan pensaun vitalísia liuliu ba veteranu sira ne’ebé mak hetan torturasaun.

“Estadu Timor-Leste pelumenus tenke tau-matan no fó atensaun netik ba ita-nia maluk veteranu sira ne’ebé mak luta ba rai ida-ne’e,” Veteranu Vidal de Jesus “Riak Leman” hateten.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here