Sekretáriu Estadu ba Asuntu Kombatentes Libertasaun Nasionál, Gil da Costa Monteiro 'Oan Soru'. Imajen/dok.Tatoli

DILI, 19 agostu 2020 (TATOLI)- Sekretáriu Estadu ba Asuntu Kombatente Libertasaun Nasionál, Gil da Costa Monteiro Oan Sorudehan, Estadu Timor-Leste kria ona polítika hodi dignifika eroi FALINTIL sira ho família, faluk no oan-ki’ak sira.

Notísia Relevante : Presiza valoriza veteranu hanesan mós eis titulares

Gil Oan Soru dehan, Governu iha vontade polítika di’ak hodi investe osan kada tinan no buka nafatin solusaun rezolve problema sira ne’ebé veteranu iha munisípiu sira enfrenta.

Nia hatutan, daudaun ne’e problema veteranu sira nian balun implementa no rezolve hela, maibé servisu balun tenke paradu tanba problema orsamentu la iha no impase polítika iha rai laran no problema propagasaun surtu COVID-19.

“Governu iha polítika, maibé desizaun ne’e tenke mai husi órgaun Estadu hotu- hotu, mais Ministériu ba Asuntu Kombatente Libertasaun Nasionál iha duni programa lubuk boot ida ne’ebé iha balun agora implementa no la’o hela no iha programa balun ita seidauk implementa ho razaun tanba situasaun polítika, situasaun orsamentu no situasaun COVID-19 ne’ebé ita nia programa lubuk ida sei para hela,” afirma Gil “Oan Soru” ba jornalista, ohin, hafoin partisipa misa agradesimentu ba loron FALINTIL ba dala-45 iha Igreja Santo António, Motaél, Dili.

Veteranu tinan-24 ne’e hatutan, atu rezolve problema veteranu sira ne’ebé seidauk iha uma no problema veteranu sira nian direitu ne’ebé sei paradu hela presiza iha estabilidade polítika ida di’ak hodi fó solusaun ba problema hotu- hotu.

Gil “Oan Soru” lakohi ko’alia sai uluk programa prioridade sira ne’ebé sei halo ba veteranu sira, tanba nu’udar membru Governu tenke kumpre ba regra Estadu hodi hein Ministru ba Asuntu Kombatente Libertasaun Nasionál (MAKLN), Júlio da Costa Sarmento “Meta Malik” no Primeiru-Ministru, Taur Matan Ruak maka bele ko’alia.

Governu rasik simu ona lista husi Konsellu Veteranu rejista númeru veteranu iha Timor-Leste iha primeira etapa hamutuk 75.000 no rejistu daruak hamutuk 124.600  iha territóriu Timor-Leste.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here