Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 18 agostu 2020 (TATOLI)-Ministru Ensinu Superiór Siénsia no Kultura (MESSK), Longuinhos dos Santos, hateten Dekretu-Lei Governu númeru 21/2020 hodi fó subsídiu temporáriu ba sidadaun Timoroan ne’ebé hela temporáriu iha estranjeiru relasiona ho pandemia globál surtu COVID-19.

Ministru Longuinhos dos Santos hato’o asuntu ne’e hodi responde ejizensia husi Aliansa Universitáriu Timor-Leste ne’ebé ejize Governu liuhosi MESSK atu kria diploma ministeriál ida ou dekretu lei hodi responsabiliza ensinu superiór iha rai laran nia propinas semestre par ezeptu DIT trismestre ida iha tinan akadémiku 2020.

Notísia Relevante :AUTL ejize Governu kria fali dekretu-lei foun

“Dekretu lei ne’e atu haree liu subsídiu ka finansiamentu ba ita-nia maluk Timoroan sira ne’ebé mak hela iha rai-liur ho temporariamente, ne’ebé totalmente dependensia ba rendementu família nian iha Timor-Leste,” dehan nia ba Tatoli iha ninia servisu fatin Colmera Dili, tersa ne’e.

Dekretu-lei ne’e aprova iha Konsellu-Ministru no kabe ba kompotensia  husi Ministériu Negósiu Estranjeiru no Kooperasaun (MNEK) hodi fó subsídiu ba estudante naun bolseiru iha rai-liur la’ós rai-laran nian.

Nune’e mós iha loron 05 fulan-juñu 2020, Prezidente Repúblika, Francisco Guterres Lú Olo, promulga Dekretu-Lei ne’e hodi fó subsídiu temporáriu ba sidadaun Timoroan ne’ebé hela temporáriu iha estranjeiru.

Sidadaun Timoroan rezide iha estranjeiru simu osan ho kustu la hanesan iha Estadu Unidu Amérika kada fulan simu $ 1000, España, Itália, Portugal no Austrália $ 500, Brasil, Cavo-Verde, Malázia,Filipina, Tailándia kada fulan simu $ 150, Tanzania, Índia, Indonézia simu $ 100, no subsídiu aplika ba fulan tolu nian.

Notísia Relevante :MESSK ho AUTL seidauk hetan solusaun

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here