Deputadu CNRT, José Virgílio, baku-fila Meza Prezidente Parlamentu Nasionál (PPN). Imajen Tatoli/António Gonçalves.

DILI, 18 agostu 2020 (TATOLI)—Reuniaun líder bankada parlamentár, ohin, deside ona data fiksu ba serimónia hatuur-hikas meza prezidénsia Parlamentu Nasionál ne’ebé deputadu CNRT baku fila ka halo rahun iha 19 maiu 2020 liubá ne’e.

Notísia Relevante: Meza prezidénsia foun to’o ona iha Parlamentu Nasionál

Sekretária Meza Parlamentu Nasionál, Deputada Lídia Norberta dos Santos Martins, fó-sai katak reuniaun líder bankada ko’alia kona-ba inaugurasaun meza Parlamentu Nasionál tanba faze konstrusaun ba meza prezidénsia foun ramata ona.

Molok deside data, reuniaun líder bankada ne’ebé prezide hosi Prezidente Parlamentu Nasionál, Deputadu Aniceto Longuinhos Guterres Lopes, halo apresiasaun ajenda ne’e hodi deside ba serimónia atu hatuur hikas fali meza prezidénsia ne’e.

“Ohin liuhosi reuniaun líder bankada deside dia 4 setembru sai data ne’ebé atu tau fila-fali meza prezidénsia ne’e, tanba 4 setembru hanesan data istóriku ida, data anunsia rezultadu konsulta popular,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, iha Parlamentu Nasionál, tersa ne’e.

Nia dehan, kona-ba misa serimónia data seidauk serteza tanba sei iha prosesu diskusaun maibé fiksa ona iha loron 4 setembru 2020 sei hatuur-hikas meza prezidénsia ne’e.

Iha reuniaun líder bankada ne’e partisipa hosi reprezentante Governu nian atuál Ministru Asuntu Parlamentár no Komunikasaun Sosiál, Francisco Jerónimo.

Entretantu, meza Parlamentu Nasionál (PN) rahun iha loron 19 maiu 2020 maizumenus 08.15 dadeersan. Hafoin meza rahun Deputadu na’in-36 hosi Bankada parlamentár Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO), aprova ona pedidu destituisaun ho votu a-favór 36. Hosi votu 36 ne’e bankada FRETILIN kontribui votu 23, KHUNTO votu 5 no PLP votu 8. Purtantu laiha kontra no abstensaun.

Hafoin aprova pedidu destituisaun iha momentu ne’ebá, bankada FRETILIN, PLP, KHUNTO no Partidu Demokratiku (PD) hili Aniceto Longuinhos Guterres Lopes  ho votu a-favór 40 hodi troka Prezidente Parlamentu Nasionál, Arão Noé de Jesus da Costa Amaral.

Iha momentu ne’ebá, bankada CNRT, UDT/FM no PUDD la simu desizaun ne’e tanba konsidera la tuir regra rejimentál.

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here