Rede Feto no Fundação Pátria realiza Simpóziu Nasionál. Imajen/Evaristo Soares Martins.

DILI, 18 agostu 2020 (TATOLI)—Rede Feto no Fundação Pátria realiza Simpóziu Nasionál hodi halo reflesaun ba progresu no dezafiu hosi implementasaun Konvensaun ba Halakon Forma Diskriminasaun hotu-hotu Hasoru Feto (CEDAW-sigla inglés) durante tinan 18 iha Timor-Leste.

Notísia Relevante: Timor-Leste seidauk iha dadus índise dadus dezigualdade jéneru

Iha Simpóziu ne’e atu kontinua ajuda estadu Timor-Leste hodi sensibiliza Konvensaun ba Halakon Forma Diskriminasaun hotu-hotu Hasoru Feto (CEDAW-sigla inglés) ba sosiedade hotu iha Timor-Leste, mak Organizasaun Nasionál Rede Feto no Fundasaun Pátria, parséria ho NGO PLAN Internasionál no ajénsia Nasaun Unida, UN Women Timor-Leste, organiza symposium CEDAW hodi halo reflesaun.

Reflesaun ne’e sei haree hikas fali progresu no dezafiu hosi implementasaun konvensaun hafoin tinan 18. Simpóziu Nasionál ne’e realiza, ohin, iha salaun Tower, Fatuhada, Dili.

Objetivu prinsipál hosi Simpóziu ne’e maka atu loke diskusaun relasiona ho progresu signifikante ne’ebé atinje ona hosi rezultadu implementasaun CEDAW no mós dezafiu sira-ne’ebé sei enfrenta no sai barreira durante implementasaun iha tinan 18 nia laran iha Timor-Leste.

“Simpóziu Nasionál ne’e importante tanba ita sei hasai pontu implemente (key findings) sira-ne’ebé mak sei fó hosi hosi partisipante no panelista sira no ita sei kompila ba relatóriu hodi fó ba sosiedade sivíl no Governu hodi tau ba relatóriu CEDAW ne’ebé mak sei aprezenta ba komité CEDAW. Simpóziu ne’e envolve oradór sira-ne’ebé espertu duni iha área CEDAW nian mak mai hato’o palestra no partisipante sira mós ita konvida organizasaun sira-ne’ebé mak iha koñesimentu kle’an kona-ba CEDAW no alunu universitáriu sira,” Fasilitadora ne’ebé lidera Simpozium, Filomenta Reis, esplika liuhosi komunikadu imprensa ne’ebé Agência TATOLI asesu, ohin.

Rezultadu hosi Simpóziu ne’e sei relata ba Governu liuhosi Sekretaria Estadu Igualdade no Inkluzaun (SEII) no mós ba organizasaun sosiedade sivíl  sira hosi diskute liután no sei inklui iha relatóriu sosiedade sivíl ba komité CEDAW.

Haree ba objetivu ida-ne’e maka Simpóziu ne’e la nakloke ba públiku tanba atu fó liu espasu ba autór prinsipál sira-ne’ebé servisu hola-parte ona no hatene di’ak kona-ba implementasaun CEDAW iha Timor-Leste, atu tuur hamutuk ho joven sira hosi universitáriu hodi deskuti no fahe ideia prinsipál sira hodi aselera di’ak liután implementasaun CEDAW iha Timor-Leste.

CEDAW nu’udar konvensaun internasionál ba direitu feto nian ne’ebé ONU adota iha tinan 1979 no vigora iha tinan 1982. Iha fulan-dezembru 2002, Estadu Timor-Leste ratifika konvensaun CEDAW ho ninia protokolu opsionál no vigora iha Timor-Leste iha 16 maiu 2003. Nune’e, reafirma komitmentu ne’ebé iha ona artigu 17 Konstituisaun RDTL kona-ba igualdade entre feto no mane.

“CEDAW rekere eliminasaun ba diskriminasaun iha aspeitu hotu-hotu iha feto sira-nia moris, hosi área edukasaun no empregu, hosi família to’o vida profisionál, hosi saúde to’o dezenvolvimentu rurál hosi konseitu falsu to’o iha gastu públiku. Ida-ne’e mós konstribui ba Objetivu Dezenvolvimentu Sustentável (ODS) no ninia misaun atu ‘la husik ema-ida iha kotuk’,” nia dehan.

Iha Simpóziu ne’e partisipa hosi Vise-Prezidente Parlamentu Nasionál, Deputada Maria Angelina Sarmento Lopes.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here