Xefe Estadu Maiór Jenerál F-FDTL, Majór Jenerál Lere Anan Timor no komandante F-FDTL sira hasai fotografia hamutuk ho oradór no partisipante sira durante semináriu nasionál ho tema “Consolidação Estratéjigico para Garantir a Segurança Maritima de Timor-Leste”. Imajen/Eugénio Pereira

DILI, 18 agostu 2020 (TATOLI)- Iha jornada  komemorasaun loron FALINTIL ba dala-45, ohin, Komandu FALINTIL-Forsa Defeza Timor-Leste (F-FDTL) liuhusi Komponente Navál realiza semináriu nasionál ho tema “Consolidação Estratéjigico para Garantir a Segurança Maritima de Timor-Leste”.

Notísia Relevante : Governu fó toleránsia pontu ba komemorasaun loron FALINTIL

 Xefe Estadu Maiór Jenerál F-FDTL, Majór Jenerál Lere Anan Timur dehan, semináriu ne’e importante ba komandu F-FDTL bele rona hanoin di’ak mai husi oradór sira kona-ba konsolidasaun estratéjiku atu garante seguransa marítima Timor-Leste iha ohin ba futuru hodi proteje rikusoin ekonómika iha tasi laran.

Lere dehan, esforsu ne’ebé lider Karizmátiku, Kay Rala Xanana Gusmão halo hodi manan fronteira marítima permanente sei fó benefísiu boot ba ekonomia ne’ebé presiza hetan seguransa maka’as hosi Forsa Komponente Navál ho apoiu husi Autoridade Marítima Nasionál (AMN).

“Konferénsia ne’e hanesan eventu ida mai husi inisiativa Komandu Komponente Navál F-FDTL nian. Sira halo semináriu ida-ne’e kona-ba kriasaun Autoridade Marítima Nasionál (AMN) ninian, tanba seguransa ba tasi ne’e, tanba ita hotu hatene ohin loron ita nia maun Boot Xanana  luta boot hodi hetan ita nia fronteira marítima entre Timor-Leste no Austrália, agora ita nia soberania iha ona, ita tenke garante seguransa hodi proteje ita nia rikusoin sira iha tasi,” afirma Lere Anan Timur ba jornalista iha Kuartél Jenerál F-FDTL, Fatuhada, Dili.

Lere dehan, ba futuru Estadu Timor-Leste tenke iha votade polítika di’ak atu investe maka’as ba rekursu umanu no ekipamentu modernu fó konfiansa ba AMN hodi halo servisu konjunta iha tasi laran.

Iha parte seluk, Lere dehan, preparasaun Komandu F-FDTL ba futuru sei kria tan Komandu Aero hodi bele kompleta forsa iha F-FDTL.

“Preparasaun ba futuru ita sei iha mehi hodi kria tan komponente Aero iha tinan 20 ka 30 bele harii ona,” nia hateten.

Iha fatin hanesan, Oradór Kapitaun de-mar-e-gueerra, Higino das Neves,  ne’ebé ko’alia kona-ba  tema “Seguransa Marítima” dehan, atu lori Timor-Leste ba oin,  Estadu presiza kria koordenasaun di’ak liu akompaña mundu iha loron hodi lori TL tenke hatene Kontestu Estratéjiku TL nian, Interese Estratéjiku, Objetivu Nasionál, Prioridade  Nasionál, Defeza no Seguransa Nasionál, Obrigasaun Estadu Timor-Leste ba Tasi, Dezafiu Seguransa Marítima, Kriasaun Autoridade Marítima Nasionál, Modernizasaun Komponente Forsa Navál.

Nia dehan, iha kontestu estratéjiku, Timor-Leste tenke hatene no akompaña mudansa ambiente mundiál nian, tanba ohin loron ema hotu konsidera tasi importante, tanba ne’e nasaun halo investimentu maka’as ba tasi hodi evita ameasa seguransa husi tasi.

“Rikusoin barak iha tasi ita tenke proteje hodi dezenvolve ita nia rain, tanba ita presiza asegura seguransa, tanba tasi ne’e importante, maibé ohin loron ita falta vontade polítika atu suporta,” nia hateten.

Ba futuru Komandante Higino das Neves dehan, presiza moderniza Forsa Komponente Navál hodi asegura seguransa iha tasi di’ak liután iha futuru.

Iha kontestu seguransa rai laran, ba oin Komponente Navál presiza asegura seguransa tasi la’ós de’it iha Dili ba too área Kosta Súl, maibé tenke asegura mós seguransa too rai ketan Oe-Cusse hodi próteze ameasa seguransa iha futuru.

Nia hatutan, iha kontestu kooperasaun atu lori Timor-Leste adezaun ba ASEAN, estabilidade polítika maka tenke garante metin hodi fó susesu ba prosesu hotu-hotu.

Eis Komandante Komponente Navál ne’e dehan, nasaun foun hanesan Timor-Leste tenke kria kooperasaun polítika, ekonomia, defeza no seguransa ho nasaun viziñu sira hanesan Austrália no Indonézia hodi suporta malu garante seguransa hamutuk.

“Australia no Indonézia importante tebes atu ita kria kooperasaun ho sira, tanba ho sira-nia suporta maka ita bele kria ita nia estabilidade seguransa ida metin liután,” nia hateten.

 Iha nivel kooperasaun internasionál liu-liu liga ba envolvimentu Timor-Leste nu’udar membru g7+ importante tebes hodi hametin mós kooperasaun defeza no seguransa, oinsá mak nasaun estadu frajilidade sira buka ajuda malu harii hikas paz no estabilidade polítika no dezenvolve nasaun frajil sira.

Nia hatutan, Timor-Leste mós sai ona membru organizasaun marítima internasionál ba futuru tenke garante mós seguransa portu marítima tasi nian hodi evita ameasa terrorizmu marítima, tráfiku umanu, tráfiku droga no krime seluk tan.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here