Xefe Estadu Maiór F-FDTL , Majór Jenerál Lere Anan Timur. Imajen/Dok. Tatoli

DILI, 18 agostu 2020 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timor, husu ba Estadu Timor-Leste atu rekoñese no valoriza funu-na’in FALINTIL no veteranu ho faluk oan-kiak sira nia luta hanesan mós ho pensaun vitalisia ne’ebé eis titulares sira hetan.

Komandante Lere dehan, nia sente fuan kanek no triste tebes, bainhira haree deputadu parlamentu nasionál no eis titulares hetan priviléjiu luxu durante tinan lima hala’o knaar iha uma fukun Parlamentu Nasionál tenke hetan pensaun vitalisia no tratamentu espesiál liu fali veteranu ne’ebé luta durante  tinan-24 nia laran.

“Ha’u rekomenda ba ita nia Estadu, primeiru tenke halo lei atu garante futuru veteranu sira nian, porezemplu se deputadu ida iha ninia pensaun vitalisia ba ninia jerasaun-jerasaun, ami veteranu sira mós tenke direitu ida ne’e ka. Veteranu luta tinan-24 halo funu la iha direitu ida ne’e, deputadu ida tinan-lima ka tinan-tolu de’it iha direitu di’ak liu fali luta na’in sira. Ida ne’e injustisa boot,”  hateten  Lere ba jornalista, ohin, hafoin partisipa semináriu nasionál FALINTIL iha Kuartél Jenerál F-FDTL, Fatuhada, Dili.

Lere triste tebes, bainhira ukun an tiha halo vizita ba munisípiu haree direita veteranu barak sei moris no hela iha uma aat no la iha kondisaun atu sente moris ho dignu iha prosesu independénsia ne’ebé sira kontribui ho vida tomak.

Veteranu rezisténsia tinan 24 ne’e hatutan, iha selebrasaun FALINTIL ba dala-45 ne’e iha veteranu balun ne’ebé ativu iha F-FDTL no balun reforma tiha sira fila ba uma moris at liután.

Tuir Lere, FALINTIL hamutuk ho povu la’ós luta de’it ba ukun an, maibé fó an ba mate husik hela faluk no oan kiak sira, hodi balun de’it maka luta too tinan-24 hodi hamutuk liberta nasaun ne’e.

“Tinan ne’e ita halo aniversáriu ba dala-45 ezisténsia FALINTIL, FALINTIL hahú ho 20-ital mil elementu, mais funu hotu veteranu kuaze 100 mak tama mai no eziste dada bandeira independénsia ho nia povu. Ida ne’e ha’u hanoin lakon boot ita nia ema barak iha ita nia luta funu libertasaun nasionál. FALINTIL la’ós mate de’it, maibé balun ema kaer no tortura no balun mai rende. Se bainhira estadu la tau matan ba ita nia veteranu sira, faluk, oan-kiak sira,” nia hateten.

Komandante F-FDTL ne’e rekomenda ba Governu liuhusi Ministru Asuntu Veteranu no Sekretáriu Estadu Veteranu Libertasaun Nasionál no Konsellu Nasionál Veteranu sei rejista preokupasaun sira-ne’e hodi rezolve problema veteranu no faluk oan kiak sira.

“Ha’u husu agora tenke buka rezolve problema sira para fó solusaun, fó importánsia ba veteranu, hanesan foin lalais ami halo Tour FALINTIL hale’u Timor, ami rona lamentasaun barak, mais ha’u dehan ita nia konsellu veteranu tinan ne’e sei rezolve,” nia hateten.

Nia hatutan, atu rezolve problema veteranu no faluk oan-kiak sira, Governu liu-liu lider nasionál sira tenke hamutuk hodi hakotu impase polítika iha rai laran.

Jornalista   : Eugénio Pereira

Editór        : Francisco Simões