Sesaun Plenária Iha Parlamentu Nasionál. Imajen /Egas Cristovão

DILI, 18 agostu 2020 (TATOLI)—Prezidente Repúblika, Francisco Guterres “Lú Olo”, sei halo abertura iha iha sesaun lejizlativa foun ne’ebé sei realiza iha 15 setembru 2020.

Prezidente Parlamentu Nasionál, Deputadu Aniceto Longuinhos Guterres Lopes, ohin, fahe informasaun kona-ba sesaun solene Sesaun Lejizlativa datoluk nian ba reprezentante líder bankada parlamentár sira tanba horisehik nia parte ba konvida ona Xefe Estadu.

“Ohin mós ko’alia kona-ba abertura solene sesaun lejislativa datoluk, resesu ne’e hotu iha loron 14 setembru no 15 setembru tama fali sesaun lejislativa foun. Iha sesaun lejislativa foun ne’e Prezidente Repúblika mós sei marka prezensa iha sesaun solene ne’e. Iha inisiu sesaun solene ne’e ba sesaun lejislativa datoluk ne’e ba dala uluk Prezidente Repúblika sei halo diskursu depois mak sei fó tempu ba líder bankada parlamentár sira halo intervensaun polítika,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, iha Parlamentu Nasionál, tersa ne’e.

Sesaun solene ne’e hala’o bazea ba Konstituisaun RDTL artigu 99 (Lejizlatura) alínea 1 hateten, lejizlatura komprende sesaun lejislativu lima no sesaun lejizlativu idak-idak iha durasaun tinan ida nian no alínea 2 dehan períodu normál funsionamentu Parlamentu Nasionál, Rejimentu mak define.

Nune’e mós Rejimentu Parlamentu Nasionál (RPN) artigu 45 (Sesaun Lejizlativa) alínea 1, sesaun lejislativa dura tinan ida, hahú iha 15 setembru no remata iha 14 setembru iha tinan tuir mai.

Alínea 2 hosi artigu 45 ne’e hateten períodu normál funsionamento Parlamentu Nasionál nian hahú iha 15 setembru no remata iha 15 jullu, sein prejuízu ba períodu suspensaun iha Natál entre 23 dezembru no 2 janeiru tinan tuir mai, no suspensaun seluk-seluk ne’ebé Parlamento delibera liuhosi maioria dois terços hosi Deputadu eleitu sira.

 Jornalista : Evaristo Soares Martins

 Editór       :  Cancio Ximenes

HAKEREK NO HATÁN

Please enter your comment!
Please enter your name here