Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 18 agostu 2020 (TATOLI)-Prezidente Repúblika, Francisco Guterres ‘Lú Olo’, husu ba Prezidente Tribunál Rekursu (PTR), Deolindo dos Santos, atu buka meiu efetivu rezolve prosesu akumuladu sira iha Tribunál Distritál haat. 

Xefe Estadu hato’o asuntu ne’e tanba preokupa ho númeru prosesu akumuladu sira ne’ebé sei a’as tebes iha Tribunál Distritál Díli, Baucau, Covalima no Oé-cusse.

“Tribunál  Rekursu (TR) foti ona medida atu aselera prosesu akumuladu sira iha Tribunál Distritál sira liuhosi movimentasaun juíz sira, mudansa sekretáriu no ofisiál justisa no Tribunál Móvel,” tenik PTR, hafoin sorumutu ho Xefe Estadu iha Pálasiu Prezidensiál, Bairro-Pité, tersa ne’e.

TR daudaun ne’e planeia ona atu harii tán Tribunál Distritál foun tolu, iha Ermera, Viqueque no Maliana, nune’e bele hakbesik asesu povu ba justisa.

“Funsionamentu ba julgamentu kazu Ermera, Viqueque no Maliana durante ne’e hala’o liuhosi Tribunál Móvel no rejista iha Tribunál Distrital Baucau, Dili, Suai no Oé-cusse, tanba ne’e númeru prosesu akumuladu a’as tebes,” nia argumenta.

Atu harii Tribunál foun, tuir Deolindo dos Santos presiza halo revizaun ba esbosu Lei Organizasaun Judisiária ne’ebé TR sei koopera ho Governu no Parlamentu Nasionál (PN) ba revizaun lejizlasaun ne’e. 

Tinan ne’e, planu atu hadi’ak kondisaun ba juíz sira la konsege implementa tanba situasaun polítika ne’ebé afeta Orsamentu Jerál Estadu 2020 xumba iha PN.

Iha períodu fériadu judisiál, Tribunál sei hala’o nafatin nia funsaun atu halo julgamentu, primeiru interrogatóriu, inkéritu no ba prosesu sumáriu sira.

Juíz sei serbisu iha turnu atu hatán ba prosesu rejistadu iha Tribunál sira no sei halo julgamentu ba kazu sira ho karatér urjénsia no ba prosesu sira ne’ebé marka tiha ona, atu nune’e labele lakon provas.

Enkuantu Tribunál sei funsiona normál filafali iha 16 setembru 2020.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here