HNGV. Imajen: rede sosiál

DILI, 18 agostu 2020 (TATOLI)-Pasiente hamutuk 4.800 maka halo ona tratamentu saúde iha sala emerjénsia Ospitál Nasionál Guido Valadares (HNGV-sigla portugés) durante fulan-jullu 2020.

Husi númeru ne’e pasiente na’in 167 maihosi asidente tráfegu karreta no motor.

Xefe Gabinete Kontrolu Kualidade, Sara Maria Xavier, informa husi totál pasiente 4.800 ne’e, kazu asidente tráfegu motor hamutuk 128, karreta iha kazu 39 no restu ne’e hanesan kazu insidente no moras seluktan.

”Depois sira ne’ebé mak hetan violénsia pankadas feto iha haat no mane iha haat hamutuk ualu no violénsia fizika sosiál ka ema hana ho rama ambon iha mane na’in ida no ema taa ho katana feto iha rua no mane iha tolu hamutuk na’in lima,” dehan nia ba jornalista sira iha HNGV, tersa ne’e.

Kazu ema baku pasiente iha 19, kazu ema tuda ho fatuk iha kazu lima, kazu violasaun seksuál iha kazu haat, no kazu tenta oho aan iha kazu hamutuk tolu.

”Husi totál 4800 ne’ebé mak tama emerjénsia 511 mak baixa iha sala maternidade depois sira ne’ebé mak baixa iha medisina interna hamutuk 358, no sira ne’ebé mak baixa iha sirurjia hamutuk 150 sira ne’ebé mak baixa iha pediatria hamutuk 164 pasiente baixa iha perinatolójia na’in tolu no sira ne’ebé mak baixa iha unidade psikiatria iha na’in haat,” tenik tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here