Sesaun plenária Parlamentu Nasionál. Imajen/TATOLI

DILI, 18 agostu 2020 (TATOLI)—Sekretária Meza Parlamentu Nasionál, Deputada Lídia Norberta dos Santos Martins, fó-sai katak aban Komisaun Permanente sei realiza plenária hodi ko’alia kona-ba kazu soe bebé no asuntu relevante sira seluk.

Reuniaun líder bankada, ohin, deside aban sei realiza plenária Komisaun Permanente nian no iha loron 2 setembru sei iha tán plenária.

“Aban primeira reuniaun Komisaun Permanente. Ohin, deside plenária dala-rua, ida mak sei realiza iha aban (19 agostu) no ida seluk mak 02 setembru 2020. Aban laiha ajenda Ordem Do Dia maibé deputadu sira hanoin katak iha relevánsia ba Komisaun Permanente iha plenária aban tanba sei ko’alia asuntu barak. Sei ko’alia kona-ba kazu soe bebé ne’ebé mak akontese daudaun, iha mós kazu sira seluk hanesan saúde nian, ko’alia mós kona-ba edukasaun no asuntu sira seluk,” dehan Deputada Lídia Norberta dos Santos Martins ba jornalista sira, iha Parlamentu Nasionál, tersa ne’e.

Iha loron 05 agostu 2020 Komisaun Permanente hili ona Deputada Lídia Norberta Martins eleita ba Sekretária Meza Komisaun Permanente no Vise-Sekretáriu mak Deputadu António Verdiál hodi hala’o kna’ar durante parlamentu nia resesu.

Iha momentu ne’e Kompozisaun Komisaun Permanente ne’e pasa ho rezultadu votasaun a-favór 20, laiha kontra no abstensaun.

Entretantu Komisaun Permanente realiza plenária bazeia Konstituisaun RDTL artigu 102 no Rejimentu Parlamentu Nasionál artigu 40 (Kompeténsia Komisaun Permanente  nian).

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here