Mapa mina no gás iha Tasi Timór. Imajen/Espesiál

DILI, 17 agostu 2020 (TATOLI)Ministru Petróleu no Minerál, Víctor da Conceição Soares, informa daudaun ne’e prosesu negosiasaun projetu kampu petrolífera, Greater Sunrise la’o hela iha nível bilaterál no trilaterál.

Tuir Ministru, iha tinan ne’e finaliza ona konseitu dezenvolvimentu kampu no Estadu Timor-Leste (TL) halo ona kontaktu ho Austrália no kompañia joint venture (konsórsiu) sira, inklui Timor Gás no Petróleu, Empreza Públika (Timor GAP, Ep), nune’e iha fulan-neen nia-laran bele finaliza rejime kontratuál no fiskál úniku ba projetu Greater Sunrise.

“Ha’u hanoin tempu besik to’o tinan ne’e nia rohan, sei konklui prosesu negosiasaun no tama ba faze kontratu fahe produsaun. Ha’u hanoin ne’e pasu ne’ebé ita tenke foti no hetan apoia husi Woodside hanesan operadór ne’ebé halo konsórsiu hanesan Timor GAP no Osaka Gas,” tenik Ministru Víctor iha Pálasiu Governu, segunda ne’e.

Governante ne’e haktuir, iha semana kotuk liubá, iha informasaun katak iha sinál di’ak tebes tanba Austrália no kompañia konsórsiu sira apresia tebes mudansa ne’ebé Governu halo hanesan kria konseitu ba dezenvolvimentu Greater Sunrise.

“Ba dahuluk, iha semana kotuk ha’u iha informasaun katak sira (Austrália no kompañia konsórsiu) kontente tebes ho mundansa ne’ebé iha tanba bele mós fó oportunidade ba sira atubele ko’alia nakloke no transpárasia ho entedimentu ida di’ak,” nia subliña.

Nune’e, nia dehan, daudaun Estadu ho Austrália hamutuk ho kompañia konsórsiu sira hahú diskute ona prosesu kódigu petrolíferu iha rejime espesiál ka unifikasaun iha Greater Sunrise, hafoin diskute fali kódigu petrolíferu ho kompañia konsórsiu sira.

Hafoin Governu TL no Austrália troka nota diplomátika kona-ba tratadu fronteira marítima no entra ein vigór iha 30 agostu 2019, Estadu  liuhosi ANPM hala’o negosiasaun ho Governu Austrália no kompañia sira hodi finaliza konseitu dezenvolvimentu Greater Sunrise.

ANPM mak lidera negosiasaun ne’e no partisipa direita mós husi empreza estatál petrolífera Timor GAP, nu’udar kontratór atu prepara planu no finaliza ba konseitu dezenvolvimentu nasionál ba projetu Greater Sunrise.

Ba kestaun ne’e, Estadu rua halo hela negosiasaun hodi iha konkordánsia mak bele hala’o esplorasaun ba kampu petrolífera tanba media line ne’ebé fahe fronteira, kampu ne’e balun tama iha área jurizdisaun Austrália.

Iha prosesu negosiasaun antes ne’e, bainhira Greater Sunrise dada mai TL sei a-favór porsentu 70 no Austrália hetan porsentu 30, maibé bainhira dada ba Austrália a-favór porsentu 20 no ba TL porsentu 80.

Iha tinan 2019 ne’e, Conocophillips fa’an asaun iha konsórsiu Greater Sunrise ba TL ho kustu millaun $350 (ekivalente porsentu 30 husi totál), ne’ebé kontratu partilla iha produsaun 03-19 no 03-20.

Nunee mós TL sosa tan asaun Shell Energy nian ho kustu millaun $300, ne’ebé reprezenta porsentu 26,6.

Tanba ne’e daudaun, TL iha partisipasaun másimu iha konsórsiu projetu Greater Sunrise (reprezenta husi Timor GAP) ho partisipasaun hamutuk porsentu 56,56, Woodside (operadór) ho porsentu 33,4 no Osaka Gás reprezenta porsentu 10.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here