Sekretáriu Estadu Komunikasaun Sosiál, Merício Juvinal dos Reis ‘Akara’, hamutuk ho Diretór CRC, Abel da Conceição, halo sorumutuk ho Rádiu Komunidade munisípiu 12 inklui RAEOA, iha salaun ANC, Caicoli, segunda (17/08). Imajen Tatoli/Egas Cristovão

DILI, 17 agostu 2020 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’ asina kontratu ho Rádiu Komunidade hamutuk 16, hodi estende kontratu subvensaun públika ba fulan-tolu, tanba hafoin iha situasaun COVID-19, rádiu komunitáriu sira seidauk hetan apoiu tranferénsia públika husi Governu.

Diretór Sentru Rádiu Komunidade (CRC, sigla portugés), Abel da Conceição, hateten seremónia ne’e aleinde atu estende kontratu ba subvensaun públika, halo mós evaluasaun ba ezekusaun fundu transferénsia públika iha fulan fevereiru, abríl, maiu 2020.  

“Ohin ita konvida jestór rádiu sira mai asina fali kontratu osamentu tranferénsia públika ba fulan-tolu, husi agostu, setembru no outubru nian. Espera iha fulan-tolu ne’e prosesu hotu bele la’o ho di’ak no rádiu komunidade sira bele hetan direitu ba transferénsia públika,” tenik Diretór Abel, iha Salaun Autoridade Nasionál Komunikasaun (ANC, sigla portugés), Caicoli, segunda ne’e.

Diretór CRC SEKOMS, Abel da Conceição. Imajen Tatoli/Egas Cristovão

Dirijente ne’e dehan, maski iha tempu COVID-19 Governu la apoia rádiu komunidade sira, maibé husi Diresaun Sentru Rádiu Komunidade SEKOMS halo esforsu nafatin hodi koopera ho parte Fundu Nasaun Unida ba Apoiu Labarik (UNICEF, sigla portugés) hodi hetan apoiu no bele halo nafatin programa.

“Rádiu sira la hetan apoiu transférensia públika husi Governu, maibé ita kontinua serbisu hamutuk ho UNICEF hodi fó apoiu, nune’e rádiu komunidade bele fó sai avizu kona-ba COVID-19 liuhosi programa balun,” nia akresenta.

Nia informa kona-ba programa 2021, CRC sei koordena ho parte SEKOMS tanba daudaun tuir Lei Orgánika foun iha mudansa naran husi Diresaun CRC ba Diresaun Nasionál Promosaun  dezenvolvimentu Mídia Lokál ne’ebé  tutela iha SEKOMS.

“Entaun ho mudansa diresaun ne’e, simu responsablidade boot liu atu dezenvolve mídia munisipál no kontinua tau-matan ba rádiu komunidade,” nia akresenta.

Iha fatin hanesan, Sekretáriu Estadu Akara, hateten aleinde seremónia asinatura, sorumutu ohin atu avalia hodi haree hamutuk dezafíu  no problema.

“Ita-nian sorumutu atu avalia  progresu no dezafíu ne’ebé maka parte rádiu komunidade iha, nune’e ita bele tau hanoin hamutuk atubele haree no tau iha planu saida maka ita presiza hadi’a ba oin,” nia dehan.

Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

Tuir governante ne’e, Governu liuhosi SEKOMS kontinua apoiu rádiu komunidade sira atubele dezenvolve di’ak liután iha nível munisípiu tanba sentru radiu komunidade ne’e iha mudansa iha Lei Orgánika foun.

Tanba ne’e, nia parte husu ba jestór rádiu komunidade idaidak atu jere rádiu ho di’ak, nune’e bele halo serbisu ho di’ak liu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here