Embaixadór Kuba iha Timor-Leste, Omar L. Marrero Bentacourt, bainhira halo vizita kortezia iha Gabinete SEKOMS, iha Palásiu Governu, kuarta (19/08). Imajen Tatoli/ Egas Cristovão

DILI, 17 agostu 2020 (TATOLI)-Governu Kuba komprometidu sei tulun Governu Timor-Leste liuhosi Sekretaria Estadu Komunikasaun Sosiál (SEKOMS) hodi halo koopersaun iha área komunikasaun sosiál.

Embaixadór Kuba iha Timor-Leste, Omar L. Marrero Bentacourt, halo vizita kortezia ba gabinete Sekretáriu Estadu Komunikasaun Sosiál, Merício Juvinal dos Reis ‘Akara’ hodi ko’alia kona-ba kooperasaun.

Tuir diplomata ne’e, órgaun komunikasaun nu’udar área importante, tanba ne’e Governu Kuba hakarak koopera ho SEKOMS atu identifika área saida maka bele halo koopersaun.

Embaixadór kuba iha Timor-Leste , Omar L. Marrero Benctacour. Imajen Tatoli/Egas Cristovão

Relasaun Kuba ho Timor-Leste di’ak tebes, desde Governu Kuba ne’ebé lideransu hosi Prezidente  Fidel Castro no Prezidente  Xanana Gusmão, no Governu antes ne’e hatudu ona kooperasaun di’ak tebes iha área saúde, ne’ebé iha estudante barak maka ba estuda iha área medisina iha Kuba,” dehan diplomata kubanu ne’e, iha Palásiu Governu, segunda ne’e.

Tanba ne’e, iha enkontru Embaixadór kobanu afirma pozisaun hodi kontinua koopera ho Governu Timor-Leste iha área Komunikasaun sosiál liuhsi programa interkámbiu sira.

“Konversa ho Sekretáriu Estadu atu haree no halo identifikasaun ba kooperasaun iha área komunikasaun sosiál,” Diplomata ne’e akresenta.

Iha fatin hanesan, Sekretáriu Estadu Akara, hateten audénsia ho diplomata kubanu, aleinde atu ko’alia kona-ba kooperasaun, atu koñese malu mós tanba diplomata ne’e nu’udar Embaixadór Kuba foun iha Timor-Leste.

Nia dehan, parte SEKOMS hakarak halo kooperasaun iha área komunikasaun sosiál tanba durante ne’e Kuba iha de’it koopersaun ho Timor-Leste iha área saúde no iha área seluk.

Sekretariu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

“Iha idea preleminár balun maka oinsá ita-nia jornalista sira liuliu mídia Estadu nian, karik sira iha eventu ruma hanesan konférensia internasionál ruma, jornalista timor-oan bele partisipa. Ami-nia diskusaun iha faze esplorasaun idea,” nia subliña.

Embaixadór Kuba hateten prontu apoiu SEKOMS iha área komunikasaun sosiál.

“Embaixadór fó hanoin SEKOMS atubele halo planu ruma iha área komunikasaun sosiál hodi hetan apoia husi Kuba, tanba nasaun ne’e iha esperiénsia barak iha área komunikasaun sosiál. Sira-nia mídia Estadu kleur ona eziste, entaun ita hanoin atu haree posibilidade kooperasaun. Embaixadór prontu atu fó apoia mai ita hanesan durante ne’e sira apoia iha área sira seluk,” Akara haktuir.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here