Adjunta Sekretária Jerál KO25 no atuál Prezidente CNJTL, Maria Dadi Soares Magno. Imajen Tatoli/Antónia Gusmão

DILI, 16 agostu 2020 (TATOLI)-Prezidente Konsellu Nasionál Juventude Timor-Leste (CNJTL-sigla portugés), Maria Dady Soares Magno, no Diretór Asia Justice and Rights (AJAR), José Luis de Oliveira, hato’o apresiasaun ba Klibur Estudante Fatuberliu (KEFA) tanba ramata ona formasaun ba joven hamutuk 125 kona-ba diskursu públiku.

“Ha’u fó parabens ba esforsu, dedikasaun, komitementu ita bo’ot sira nian tanba ha’u hatene di’ak tebes ita bo’ot sira maske laiha osan sentavu 10 maibé konsege realiza atividade formasaun ne’e,” informa nia hafoin distribui sertifikadu ba formandu sira iha Asosiasaun HAK Dili, domingu (16/08).

KEFA sai modelu no ezemplár, signfika KEFA mai ho vizaun ida natoon atu kontribui ba prosesu dezenvolvimentu.

“Ne’e duni husi prezensa KEFA nian hatudu ona katak vizaun ida loloos mak ne’e konsege halibur no forma duni ninia joven sira seluk  hahú husi Bairru, Aldeia, Suku, Postu mai to’o iha Munisípiu,” tenik tan.

Diretór Asia Justice and Rights (AJAR), José Luis Oliveira. Imajen/Osória Marques.

Iha fatin hanesan Diretór AJAR, José Luis de Oliveira, hateten : “Ha’u apresia no inspiradu tebes tanba ne’e mak ha’u bele dehan sira mak patriota foun, ne’e duni hahú agora ba oin imi tenki kadi nafatin kakutak no abilidade atu bele kontribui duni ba rai ida ne’e,”.

Atu dezenvolve nasaun ne’e, nia dehan presiza kontribuisaun husi jerasaun foun ho ispiritu nasionalismu no patriotismu no mós abilidade no kapasidade di’ak.

“Ha’u fiar imi iha duni ispiritu ukun rasik an tanba ne’e mak imi la tane liman no la hein projetu de’it, maibé imi bele halo duni buat ruma hodi kontribui ba rai ida ne’e,” tenik tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here