Diretór Jerál CCT, Sisto Moniz Piedade, dadalia ho jornalista sira hafoin hala'o enkontru ho Primeiru-Ministru, Taur Matan Ruak, iha Palásiu Governu, segunda (17/08). Imajen Tatoli/ Egas Cristovão

DILI, 17 agostu 2020 (TATOLI)-Kooperativa Kafé Timor (CCT, sigla portugés), oferese ona ai-farina u’ut hamutuk tonelada 40 ba empreza Heineken hodi prodús serveza ho marka Liurai iha Timor-Leste.

“CCT fornese ai-farina u’ut ba kompañia Heineken hodi prodús serveja ho marka Liurai. Ami husu ba Primeiru-Ministru atu haree ba futuru rai mamuk ne’ebé iha, tanba rai ne’e luan tebes entaun oinsá maka utiliza rai mamuk sira ne’e hodi kuda buat ruma,” relata Diretór Jerál CCT, Sisto Moniz Piedade, hafoin ramata enkontru ho Primeiru-Ministru, Taur Matan Ruak, iha Palásiu Governu, segunda ne’e.

Responsável ne’e nota katak indústria ne’e di’ak tanba bele fó oportunidade ba agrikultór sira atubele kuda ai-farina no loke mós postu serbisu ba timor-oan sira.

“Ita hakarak prodús serveja Liurai barak, presiza ai-farina u’ut mós tenke barak, to’o agora ami fornese ba Heineken tonelada 40. Seidauk mosu COVID-19 sira husu ami kada fulan fornese tonelada 25 to’o 30, maibé daudaun ne’e sira presiza ai-farina barak,” nia akresenta.

Área ne’ebé CCT identifika atu kuda ai-farina maka iha munisípiu Viqueque, Lautém, Covalima, Manufahi no Bobonaro.

“Ha’u hanoin produsaun ne’e di’ak tebes tanba sira loke indústria iha ita-nia rain no fó serbisu barak ba timor-oan sira. Ha’u rona dehan traballadór timor-oan ne’ebé serbisu iha empreza ne’e besik 500, ne’e pasu di’ak loos ba ita,” nia subliña.

CCT apoia ai-farina ba empreza Heineken hahú iha tinan 2019 to’o agora, no ai-farina sira maihosi munisípiu Viqueque no Lautém.

Daudaun ne’e, Governu liuhosi Ministériu Agrikultura no peska (MAP) oferese rai ektare 25 iha munisípiu Lautém ba CCT atu kuda ai-farina.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here