Diretór Jerál CCT, Sisto Moniz Piedade, dadalia ho jornalista sira hafoin hala'o enkontru ho Primeiru-Ministru, Taur Matan Ruak, iha Palásiu Governu, segunda (17/08). Imajen Tatoli/ Egas Cristovão

DILI, 17 agostu 2020 (TATOLI)Diretór Jerál Kooperativa Kafé Timor (CCT, sigla portugés), Sisto Moniz Piedade, informa iha tinan ne’e kooperativa nasionál ne’e sosa ona kafé hamutuk tonelada 11.000.

“Tinan 2020 hahú iha 28 maiu to’o agora, ami sosa ona kafé tonelada 11.000. Tanba ne’e maka ami mai hasoru Primeiru-Ministru hodi informa serbisu saida mak ami halo iha tinan ida-ne’e,” relata Dirijente ne’e hafoin reuniaun ho Primeiru-Ministru (PM), Taur Matan Ruak, iha Palásiu Governu, segunda ne’e.

Notísia Relevante: Ámbitu Prevensaun COVID-19, CCT Kontinua Sosa Kafé Tuir Ezijénsia Komunidade Agrikultór

CCT planea katak sei sosa kafé to’o tonelada 13.000 no husi totál ne’e sei esporta ba rai-li’ur hamutuk tonelada 2.100.

Kona-ba produsaun kafé iha 2020, Diretór Jerál ne’e dehan, tanba iha mudansa klimátika iha tinan ne’e ho bailoron naruk tebes, provoka kafé balun mate no empreza balun deside la sosa maibé CCT de’it maka sosa tanba ezijénsia maihusi komunidade.

Kooperativa kafé ne’e aplika presu kafé kada kilograma bazeia ba presu mundiál.

“Kona-ba presu, ami mós informa ba Primeiru-Ministru katak ami aplika presu kafé kada kilograma ne’e adopta ba merkadu mundiál, ami la halo presu,” nia subliña.

Dirijente ne’e haktuir, CCT kuandu atu sosa kualkér produtu tenke halo karta ba Ministériu Agrikultura no Peska (MAP), administradór, no ba igreja hodi fó sai iha misa no públika mós iha mídia katak CCT atu hola kafé ho presu definitivu.

“Tanba ne’e maka presu mundiál sa’e, ami mós hasa’e maibé tun ami mós hatun. Kuandu presu la normál ami la naran hatun presu ne’e desde inísiu,” nia akresenta.

Nia dehan, bainhira iha empreza ruma sosa kafé ho folin a’as liu CCT nian, di’ak liután tanba bele halo agrikultór sira kontente.

Durante ne’e CCT la’ós sosa de’it kafé maibé halo mós reabilitasaun ba kafé sira, apoia ai-oan, estabalese mós klínika hodi fó tratamentu saúde ba komunidade agrikultór sira.

Iha tempu sosa kafé, CCT kontrata traballadór timor-oan kuaze 4.000 hodi halo serbisu iha fábrika prosesamentu kafé, tanba prodúz kafé presiza traballadór barak no kada loron karreta tula kafé ba iha fábrika hamutuk 250.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here