Prezidente eleita Fiskál Asosiasaun Halibur Defisiente Matan Timor Leste (AHDMTL), Gilberta Pereira. Imajen/Osória Marques.

DILI, 16 agostu 2020 (TATOLI)–Asosiasaun Halibur Defisiente Matan Timor Leste (AHDMTL) liuhosi kongresu konsellu fiskál ba daruak eleje Gilberta dos Santos Pereira sai nu’udar prezidente Fiskál AHDMTL ba períodu tinan lima (2020-2025).

Prezidente eleita ba Fiskál Asosiasaun Halibur Defisiente Matan Timor Leste (AHDMTL), Gilberta Pereira, hateten kontente bainhira sai eleitu ba prezidente Fiskál AHDMTL nian, maibé kontente ida ne’e ho sentidu ida, la’ós kontente ho fuan mamuk maibé kontente hanoin katak ida-ne’e todan ida-ne’ebé mak tula ba kabaas.

“Iha mandatu durante tinan lima (5) ne’e, konsellu fiskál só halo monitorizasaun no hela besik ba ema ho defisiente matan sira hodi ajuda sira atu hakbiit no haforsa sira iha edukasaun nian no transforma sira iha eskola ba ensinu báziku to’o ensinu superiór,” dehan Gilberta Pereira ba jornalista sira hafoin eleita iha kongresu konsellu fiskál ba daruak AHDMTL, iha Salaun Esperansa, Dili, foin lalais ne’e.

Nia dehan, servisu ne’e todan tanba to’o agora AHDMTL rasik nia fatin iha área rurál seidauk iha hodi hamahan sira-nia maluk. Bainhira fatin laiha labele halibur sira no transforma sira hodi asesu ba edukasaun.

Tuir nia, iha área rurál ne’e fatin ne’ebé izoladu tebes no ema halo deskriminasaun ba sira no sira la asesu buat hotu, ne’e signifika marjinalijadu.

“Tanba ho ida-ne’e mak ha’u hakarak esforsu ho oinsá mak ami bele halibur ami-nia maluk defisiente sira hodi asesu ba edukasaun,” nia dehan.

Nia hateten, nia reprezenta feto ida hakarak hamriik nu’udar feto ida no enkoraza sira dada besik sira para loron ida sira mós bele hamriik iha fatin ida-ne’e, tanba sira-nia matan mak defisiénsia maibé sira-nia fuan la defesiansia.  

“Ho ami-nia kapasidade ne’ebé mak iha no ho kondisaun defisiénsia, maibé ami-nia matan mak defisiénsia maibé ami-nia fuan la defisiénsia. Ami-nia fuan nafatin nakloke hodi sente ami-nia maluk defisiente sira seluk,” nia dehan. 

Entretantu, pakote sira ne’ebé mak konkorre iha eleisaun estrutura AHDMTL nian kompostu hosi pakote A no pakote B. Pakote A mak Gilberta dos Santos Pereira no pakote B mak Prezidente Fiskál AHDMTL sesante, Jacinta Da Cruz.

Bainhira eleisaun ramata no ha apuramentu rezultadu final, fó sai rezultadu katak Gilberta dos Santos Pereira mak sai eleitu ba périodu ba tinan lima mai. Pakote A ho votu hamutuk 56 no pakote B ho votu 4 de’it, entaun Gilberta dos Santos Pereira mak sai eleitu ba Prezidente Fiskál AHDMTL ba tinan lima.

Estrutura ne’e kompleta ho Vise-Prezidente Fiskál AHDMTL, Matinho Guterres, Sekretáriu, Domingos dos Santos, tezoreiru Lourenço Gusmão no reprezenta ema ho defisiénsia mak Norberta Soares.

Jornalista : Osória Marques

Editór      : Cancio Ximenes

.

HAKEREK NO HATÁN

Please enter your comment!
Please enter your name here