Koordenador KEFA Guilhermino Fernandes.

DILI, 16 agostu 2020 (TATOLI)-Klibur Estudante Fatuberliu (KEFA) iha domingu (16/08) fahe ona sertifikadu ba formandu 125 ne’ebé partisipa ona formasaun kona-ba diskursu públiku durante fulan-ida iha sala auditória Asosiasaun HAK Faról Dili.

Koordenadór KEFA, Guilhermino Fernandes, hateten formasaun ne’e ho intensaun atu prepara joven sira sai master of cerimony (MC), notulensia no bele halo debate públiku.

Tuir nia fofoun ema 164 maka rejista maibé na’in 39 la konsege partisipa  no falta de’it formandu 125 mak konsege finaliza formasaun ne’e.

“Kada semana dala ida de’it ne’ebé fulan ida partisipantes sira hasoru malu ho formadór  sira dala haat de’it iha kada domingu,” tenik nia ba Tatoli iha Asosiasaun HAK Faról Dili.

Formandu hirak ne’e la’ós mai de’it husi Munisísipiu Manufahi maibé  nia relata akumula hotu husi Munisípiu 11 inklui Rejiaun Administrativa Espesiál Oé-Cusse Ambeno (RAEOA).

“Ami prepara hodi lori malu ba faze aprende hodi garante ba futuru katak ita jerasaun foun mak sei subtitui fali saida mak inan-aman sira halo ona,” katak nia.

Nune’e iha biban hanesan Fundadór KEFA, Eucelides Torejaun, hateten objetivu hari’I KEFA atu halo kontrolu ba problema sosiál ne’ebé akontese iha Fatuberliu inklui mós kapasitasaun ba jerasaun foun sira husi Fatuberliu no Munisípiu seluk tan.

KEFA estabelese iha tinan 2010, durante tinan besik 10 ne’e konsege ona oferese formasaun ba joven sira kuaze rihun 2-resin, pursentu 50 feto.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here