Eis Primeiru-Ministru, Kay Rala Xanana Gusmão asiste jogu entre AS Ponta Leste no Assalam FC, ohin lorokraik. Imajen Mídia LFA

DILI, 15 agostu 2020 (TATOLI)-Fundadór Liga Futeból Amadora (LFA), kayrala Xanana Gusmão, observa Liga Futeból Amadora hatudu rezultadu pozitivu durante tinan haat 2015 to’o 2019.

“Ita ohin iha primeiru kongresu atu haree ba futuru, ita hotu bele haree ba nia rezultadu pozitivu hanesan hamosu entuziasmu  bo’ot hosi foinsa’e sira hodi ezerse sira-nia diretu hodi hetan oportunidade hodi joga iha klube sira ida ne’e rezultadu pozitivu ida,” dehan Xanana iha ninia diskursu durante Kongresu Ordináriu LFA iha Suai Room Timor Plaza Dili.

Notísia Relevante :Nilton Gusmão re-eleitu ba Prezidente LFA

Durante tinan haat ho prezensa LFA hamosu mentalidade di’ak liliu disiplina jogadór sira iha eventu sira.

“Ita haree klube sira agora komesa mós atu hadi’a sira-nia jestaun hodi nune’e bele simula sustentabilidade ba kada klube idaidak tanba dalan sei naruk hodi hakat ba oin,” tenik Xanana.

Maski liga ne’e ho karaktér amadora maibé nia dehan liga ne’e kontribui ona dezenvolvimentu desportu no hadi’a jogadór sira-nia moris.

Notísia Relevante :Nilton Gusmão kandidatu úniku ba Prezidente LFA

Liga ne’e mós mosu atu fasilita FFTL hodi halo selesaun ba jogadór nasionál ho rigór hodi suporta ekipa nasionál ida kualidade hodi reprezenta Timor-Leste iha eventu internasionál sira.

Jornalista  : Hortencio Sanchez

Editór        : Agapito dos Santos

HAKEREK NO HATÁN

Please enter your comment!
Please enter your name here