BAUCAU, 15 agostu 2020 (TATOLI) –Sarani ua’in Baucau-oan, inklui Bispu Dioseze Baucau, Don Basilio do Nascimento, padre, madre, leigu, embaixadór Repúblika Indonézia mai Timor-Leste, Sahat Sitorus, membru Governu balun, deputadu  balun no konvidadu importante sira seluk tan, sente orgullu no apresia ho oferta ai-han tradisionál ne’ebé prepara husi sarani sira Suku Bahu (Bairru Maucale), Gari-uai, no Seiçal, iha ámbitu serimónia re-konsagrasaun (re-inaugurasaun) Igreja Parókia Santo António Baucau, ohin.

Notísia Relevante : Don Basílio re-inaugura Igreja Parókia Santo António Baucau

Bainhira bainaka ka konvidadu sira termina serimónia misa santa re-konsagrasaun Igreja Parókia Santo António Baucau, konvidadu hotu halibur-malu iha jardín Dioseze Baucau hodi asiste ko’a dose “cake”  no loke tua sampana  ne’ebé prezide husi Don Basilio do Nascimento no Padre Parókia Santo António Baucau, Pe. Manuel Ximenes, SDB, molok ba jantár konfraternizasaun.

Iha jantár ne’e, fahe ba grupu tolu, meza rua iha jardín Dioseze Baucau nian  prepara ai-han ba sarani ein-jerál no iha Salaun Dioseze nian prepara ai-han ba bainaka no konvidadu sira.

Husi preparasaun no oferta ai-han sira-ne’e, sarani husi Suku Bahu (Maucale),  Suku Seiçal no Suku Gari-Uai, prepara ai-han tradisionál oioin ho nia sabór orijen Timor nian (livre kímika).

Ai-han tradisionál ne’ebé halo ema ua’in apresia no orgullu mak hanesan, etu-tukir iha au, sedok batar-uut, lakeru-sedok, lehe-da’an (espésie koto),  ikan-saboko, kulu bafa iha bua-kulit kahur ho ai-dila funan no tahan,  ai-farina saboko iha bua-kulit kahur ho ai-dila funan, kulu-tunu, kulu-sona, katupa ho foos mean, tukir na’an bibi,  ai-dila fuan (okir) bafa, na’an manu timor tunu ho da’an, manu tolun da’an timor nian, na’an fahi tunu tau masin de’it, na’an bibi tunu tau masin de’it, batar da’an, batar-sona ho fore-rai no seluk-seluk tan.

“Ai-han sira-ne’e mak reprezenta ita Timor nia orijen dezde bei-ala sira-nia tempu. Simples, maibé nia sabór. Imi  jerasaun foun tenke prezerva nafatin ita Timor nia hahán tradisionál sira-ne’e,” hateten Esperansa da Costa, kolaboradór Sentru Pastoral Santo Don Bosco, Maucale, Bahu, Baucau, bainhira dada-lia ho Agência Tatoli.

Padre, madre no konvidadu importante sira husi Dili no sarani sira husi estasaun parókia sira seluk ne’ebé hadulas meza hahán tradisionál nian ho ksolok foti ai-han tradisionál lubun ne’e hodi lia tun ba tia no tiu sira ne’ebé prepara ai-han ne’e dehan, “hahán ida-ne’e (ai-han tradisionál, red)  mak di’ak-liu hotu ona. Parabéns ba tia  no tiu sira nia sakrifisiu no oferta kmanek ida-ne’e.”

Atu halo sabór liután ai-han tradisionál sira ne’e iha konvidadu sira nia futar-ibun, sarani sira Sentru Pastoral Maucale nian prepara mós tua-mutin (husi akadiru)  hodi oferta mós ba konvidadu sira.

Iha au-laran, Jovito da Costa, leba tua-mutin ne’e hodi kaer mós kopu ne’ebé halo husi rai-mean (kopu-rai) oferta no fui ba konvidadu sira hodi hemu.

Maioria konvidadu sira; padre, leigu no sarani sira barak tebes hemu tua-mutin ne’e slot ida-ida no sente tua-mutin nia sabór orijinál.

“Ida-ne’e reprezenta duni Baucau nia lisan ka kostuma bainhira halo lia-mate no lia-moris (feto-sá no uma-ne). Hemu tua-mutin, han ho hahán tradisionál, liuliu na’an tunu sira. Furak tebes,”  hateten José Boavida, nu’udar sarani Baucau-oan ne’ebé akompaña konvidadu sira hadulas meza ai-han tradisionál nian.

Ai-han tradisionál simples ida-ne’e furak liután iha konvidadu sira-nia futar matan, bainhira ai-han sira-ne’e,  oferta iha luhu-laran no tiu-oan (espésie bikan) ne’ebé homan husi akadiru-tahan.

Jornalista : Francisco Simões

Editor.       : Rafy Belo

HAKEREK NO HATÁN

Please enter your comment!
Please enter your name here