Unidade Espesiál Polísia (UEP) hala'o atraksaun bainhira komemora aniversariu ba dala-XI iha Kuartel UEP, Bairru-Pité, Dili, 14 agostu 2020. Imajen/Antonio Goncalves

DILI, 14 agostu 2020 (TATOLI)-Komandante Jerál Polísia Nasionál Timor-Leste (PNTL), Komisáriu Faustino da Costa, informa, Komandu PNTL Baucau kaptura ona suspeitu ida ne’ebé sona kanek vítima Leonel Freitas iha Vila Nova, Baucau Vila.

Notísia Relevante : PNTL buka tuir autór sona Leonel Freitas iha Vila Nova-Baucau

PNTL mós halo identifikasaun ba kazu sona vítima Leonel Freitas maka hada’et too problema sunu uma iha Aldeia Uasilawa, Suku Nunira, Postu Administrativu Laga, Munisípiu Baucau, ne’ebé envolve suspeitu na’in-neen (6).

Komandante Jerál PNTL, Komísariu Faustino da Costa. Imajen/Egas Cristovao

“Ami identifika ona ema balun, tanba kazu Vila Nova, Baucau, ninia tentativa omisídiu ne’e suspeitu iha Polísia nia liman ona, tanba agora (kazu sunu uma Nunira) ami halo identifikasaun ba ema na’in-neen, tanba ne’e la’ós konsidera ona fragante delitu, tanba ne’e liuhusi prosesu hodi hein tempu sei determina sei foti hotu autór sira ba prosesu tuir lei,” afirma Komisáriu Faustino da Costa, ba jornalista, ohin, iha Komandu UEP, Bairru-Pité, Dili.

Tuir relatóriu investigasaun PNTL nian identifika loloos populasaun sira nia uma ne’ebé hetan sunu hamutuk lima (5) konta mós ho dapur.

Notísia Relevante : Asaltu iha Nunira, sunu uma-12 no na’in-rua kanek

“Tuir relatóriu ne’ebé ami hetan hosi komandu munisípiu uma loloos ne’e uma lima maka hetan sunu, maibé uma hanesan dapur ka hariis-fatin ne’e hamutuk hotu maka 11,” Komisáriu Faustino da Costa hateten.

Komandante Jerál PNTL  ne’e hatutan, kazu hirak ne’e akontese envolve grupu Organizasaun Arte Marsiál ne’ebé Governu reativa hikas, foin lalais ne’e. Mas, agora daudaun PNTL la tolera kualkér grupu Organizasaun Arte Marsiál hodi uza atributu organizasaun nian hamosu problema hodi halo povu kbiit laek sira maka sai vítima.

Atu antesipa problema labele akontese, PNTL sei koordena ho autoridade suku sira hodi prevene kazu ne’e labele akontese no mosu tan iha fatin seluk.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here