Karreta ho marka Nissan Terrano no númeru matrikula 21:630 ne'e nu'udar parte husi karreta Estadu ne'ebé Abril Pereira, tinan barak utiliza ba interese privadu. Imajen/CAC

DILI, 14 agostu 2020 (TATOLI)- Pontu Fokál Komisaun  Anti-Korrupsaun (CAC) ba Ekipa Fiskalizasaun Konjunta (EFK), Euclides Madeira, apresia no agradese ba funsionáriu públiku Abril Pereira iha Ministériu Edukasaun, ne’ebé ho sentimentu nasionalizmu no patriotizmu hodi voluntáriamente entrega karreta Estadu nian ne’ebé durante tinan barak uza hodi hala’o servisu Estadu.

“Lori EFK nian naran hakarak apresia Señor Abril Pereira nian laran di’ak nu’udar utilizadór karreta Estadu entrega fila-fali ba ekipa konjunta Estadu. Ida ne’e hatudu ezemplu di’ak tebe-tebes tanba durante nia uza iha tinan barak nian laran kuidadu karreta ne’e to’o ohin loron entrega mós ho kondisaun di’ak,” hateten Pontu Fokál CAC ba EFK, Euclides Madeira liuhusi nota komunikadu imprensa ne’ebé Agência Tatoli asesu, ohin, husi CAC.

funsionáriu públiku Abril Pereira, entrega karreta Estadu nian ba Ekipa Fiskalizasaun Konjunta (EFK). Imajen/CAC

Serimónia entrega karreta ne’e hala’o iha edifísiu Ministériu Edukasaun,  Vila Verde, Dili, no sai sasin husi ekipa Komisaun  Anti-Korrupsaun (CAC), Polísia Nasionál Timor-Leste (PNTL), Komisaun  Funsaun Públika (CFP), Diresaun Nasionál Transporte  no Terrestre (DNTT), Patrimóniu Estadu no ofisial Ministériu Edukasaun rasik.

 Karreta ho marka Nissan Terrano no númeru matrikula 21:630 ne’e patrimóniu doasaun husi Banku Mundial ba Ministériu Edukasaun iha tinan 2003-2005 liubá ne’ebé funsionáriu kontratadu sira uza ba hala’o servisu Estadu nian.

Patrimóniu hirak ne’e rejistadu ona iha Diresaun Patrimóniu Estadu, Ministériu Finansa (MF)  no oras ne’e EFK kontinua hala’o servisu rekollamentu ba patrimóniu Estadu hirak ne’e iha utilizadór sira-nia liman.

Rodolfo Aparicio nu’udar investigadór iha Ministériu Edukasaun hateten, patrimóniu Estadu husi doasaun Banku Mundiál nian identifika ona no oras ne’e EFK sei hala’o asaun represivu hodi rekolla hotu karreta hirak ne’e tanba funsionáriu utilizadór sira balun la servisu ona iha Ministériu Edukasaun.

Maske eis-funsionáriu ME oras ne’e servisu ona iha fatin seluk maibé kontinua utiliza karreta doasaun Banku Mundial nian ho xapa matrikula privadu.

“EFK identifika hotu ona karreta hirak ne’e no sei kontinua rekolla hotu ba iha patrimóniu Estadu,” nia hateten.

EFK apela ba eis-funsionáriu ME sira ne’ebé sei kontinua utiliza karreta Estadu ne’ebé doasaun husi Banku Mundial atu halo tuir Abril Pereira hodi entrega voluntáriamente ba EFK. Tanba bainhira ME halo reziste la entrega karreta ba EFK sei simu konsekuénsia iha lei nia oin.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here