Responsável UNICEF iha Timor-Leste, Valerie Taton entrega simbolikamente ekipamentu serbisu ba Asuntu Parlamentar Komunikasaun Sosiál, Francisco Jerónimo, iha Gabinete MAPKOMS, Palásiu Governu, sesta (14/08). Imajen/MAPKOMS

DILI, 14 agostu 2020 (TATOLI)-Fundu Nasaun Unida ba Apoiu Labarik (UNICEF, sigla portugés) iha Timor-Leste, entrega laptop rua ba Rádiu Metro FM ne’ebé simu hosi Ministériu Asuntu Parlamentár no Komunikasaun Sosiál (MAPKOMS), hodi halo streaming online hodi kontinua promove direitu labarik iha Timor-Leste.

Responsável UNICEF iha Timor-Leste, Valerie Taton, hateten apoiu laptop rua ne’e ho kustu $1.090, UNICEF fó ba Rádiu Metro FM, ho objetivu atu ajuda rádiu ne’e divulga informasaun.

“Apoia ne’e atu ajuda sira bele halo streaming online atubele promove direitu labarik no mós divulga informasaun kona-ba COVID-19 iha Timor-Leste,” dehan Responsável UNICEF, iha Palásiu Governu, sesta ne’e.

Nia mós konsidera, rádiu hanesan meiu importante hodi bele divulga informasaun ba komunidade ba territóriu tomak.

Iha fatin hanesan, Ministru Asuntu Parlamentar Komunikasaun Sosiál, Francisco Jerónimo, agradese ba inisiativa UNICEF hodi bele ajuda rádiu nasionál ne’e halo serbisu.

“MAPKOMS agradese ba UNICEF nia ajuda, nune’e Rádiu Metro FM bele halo sira-nian knaar ho di’ak liután tanba atu halo serbisu ida presiza iha fasilidade,” tenik Ministru.

Governante ne’e dehan, durante ne’e kooperasaun entre Governu Timor-Leste ho UNICEF iha área komunikasaun sosiál atu suporta divulga informasaun promove direitu labarik sira iha área remota no informasaun ba prevensaun COVID-19.

Nia informa, parte UNICEF sei kontinua apoia MAPKOMS ho fundu $160.000 ba programa promosaun direitu labarik no informasaun COVID-19 inklui lori labarik sira ba asesu eskola liuhosi divulgasaun infomasaun iha rádiu komunidade sira.

“Osan ne’e la mai apoia direita iha MAPKOMS, maibé ba rádiu komunidade sira ne’ebé hakarak realiza programa bele halo proposta ba UNICEF hodi hetan apoiu fundu,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here