Polísia Nasionál Timor-Leste (PNTL) husi Unidade Espesial Polísia (UEP) hala'o atraksaun bainhira komemora aniversariu ba dala-XI iha Kuartel UEP, Dili, 14 agostu 2020. Imajen Tatoli/Antonio Goncalves

DILI, 14 agostu 2020 (TATOLI)- Komandu Polísia Nasionál Timor-Leste (PNTL)  hato’o parabéns ba aniversáriu Unidade Espesiál Polísia (UEP) ba dala-XI hodi kontinua hala’o ninia misaun garante nafatin funsionamentu seguransa internu iha Timor-Leste.

Unidade Espesiál Polísia (UEP) hala’o atraksaun, 14 agostu 2020. Imajen/Antonio Goncalves

Komandante UEP Superintendente Xefe, Orlando Gomes dehan, tinan XI EUP eziste, maibé sei iha enfrenta problema oioin no presiza hetan apoiu husi Governu no Komandu PNTL hodi fó apoia ba dezenvolve instituisaun atu garante pás ba povu no nasaun.

UEP mós hala’o misaun unidade hodi bele garante no kumprimentu misaun sira ne´ebé sira simu tuir baze legál ida iha PNTL, Dekretu-Lei nú.9/2009, loron-18 fevereiru, lei orgánika PNTL, artigu 28, hodi tuir komandu no kontrolu Komandante Jerál PNTL.

Funsaun UEP hanesan unidade rezerva ida, ho efetivu variavel, ne’ebé atua tuir orden husi komandante jerál, iha situasaun reforsu ba komandu munisípiu sira ka iha situasaun kumprimentu misaun autónoma.

UEP iha elementu sira preparadu no treinadu atu kumpre misaun sira hanesan, rezolusaun no jestaun insidente krítiku. Intervensaun tátika iha situasaun violénsia konsentradu ka ho perigu ne’ebé aas, kompleksu no ho risku. Manutensaun no re-estabelesimentu orden públika, seguransa no protesaun ba entidade boot, seguransa ba eventu boot sira.

Inativasaun explozivu no ezekusaun buska preventivu sira, Seguransa instalasaun sensivel, preferensialmente iha situasaun apoiu ka reforsu, Preparasaun no projesaun forsa ba misaun internasionál.

Superintendente Xefe Orlando hatutan husi ezisténsia UEP harii tan unidade tolu hanesan, Unidade Intervensaun Rápida (UIR) ne’ebé muda naran ba Batallaun Orden Públiku (BOP) no Corpo Seguransa Pesoál (CSP) agora koñesidu ho naran Companha Seguransa Pesoál (CSP), no Unidade Rezerva Polísia (URP) ne’ebé koñesidu ho naran Companha Operasaun Espesiál (COE). Mudansa ida ne’e hatudu unidade ida forte reprezenta PNTL.

“Unidade sira ne’e hatudu duni sira nia espíritu korpu ida aas, sub unidade CSP no COE importante duni hodi eziste, tanba se maka hakarak integra ba unidade rua ne’e hakru’uk ba selesaun rigorozu  no kursu espesializasaun ne’ebé difisil,” afirma Orlando.

Nia husu ba Komandu PNTL no Governu ba atu kontinua apoia kapasita membru sira nia rekursu tenke iha rekursu téknika profisionál liu membru PNTL sira seluk.

Atu garante estabilidade seguransa, BOP, CSP no COE sai nu’udar liman kro’at Estadu nian sai hanesan família no forsa ida metin ajuda no kompleta malu iha misaun servisu saida de’it maka Estadu presiza sira prontu atu apoia garante estabilidade seguransa.

“UEP nu’udar unidade rezerva PNTL prontu lidera kualkér sitasaun atu garante seguransa interna ne’ebé ho intensidade aas tatu kombate krime organizadu no mantein lei no orden iha Timor-Leste,” nia afirma.

Durante tinan XI, EUP kontinua kapasita membru no halo rotasaun ba membru sira nia servisu hodi bele gaña esperiénsia barak liután ho apoiu Governu no parseiru internasionál sira.

Komandante UEP husu ba komandu PNTL atu apoiu no rezolve problema téknika ne’ebé hasoru menus transporte operasionál, lojístika, fardamentu Exlosive Ordnance Disposal (EOD) ba destruisaun arma komesa aat no liu ona prazu.

“Unidade ne’e la iha ekipamentu protesaun adekuadu, ezemplu farda prova de bala, ekipamentu ne’ebé iha balun liu ona prazu no tuan ona no labele uza hanesan farda protesaun Ekipa Unotivasaun Exlosive Ordnance Disposal (EOD) ne’ebé uluk apoia husi Guarda Nasional Republikanu (GNR) Portugál,” nia hateten.

Nia hatutan, bainhira UEP iha ekipamentu sufisiente maka bele ajuda servisu la’o ho efetivu no profisionál apoia seguransa interna.

EUP liuhusi Unidade Unotivasaun Exlosive Ordnance Disposal (EOD) durante ne’e apoia servisu hodi halo destruisaun ba granada, morteiru ne’ebé povu hetan husi Funu II Guerra Mundiál nian iha territóriu Timor-Leste.

Parte seluk, Komandante Jerál PNTL, Komisáriu Faustino da Costa, husu atu UEP kontinua hala’o nafatin nia funsaun no parte Komandu PNTL ho Governu sei buka meius hodi rezolve problema sira ne’ebé EUP enfrenta.

Faustino dehan, mezmu EUP nu’udar unidade espesiál iha Komandu Jerál nia okus, hamutuk ho unidade polísia sira seluk presiza duni hetan atensaun espesiál hodi ejerse sira-nia funsaun tuir lei.

“Ita iha misaun boot ida maka garante seguransa ba ita nia nasaun no sosiedade sira,” Faustino da Costa apela.

Komisáriu Faustino da Costa dehan, EUP espesiál liu iha lei orgánika PNTL no presiza tebes atu hetan apoiu ekipamentu espesiál hala’o misaun ho di’ak liután kumpre orden tuir regulamentu sira.

Faustino rekoñese problema sira ne’ebé EUP enfrenta no  komandu kontinua anota hodi hato’o ba Governu bele solusiona tuir planu no programa Orsamentu Jerál Estadu (OJE) ne’ebé aprezenta kada tinan.

“Komandu mós nota no hatene katak, la’ós de’it EUP maka presiza kapasitasaun no kapasidade de ekipamentu hanesan meius de apoiu, maibé unidade no komandu munisípiu too oras ne’e seidauk sufisiente ba ita atu  aumenta ita nia knaar ho másimu, maibé ho limitasaun ne’ebé iha sei la hamate ita nia responsabilidade atu asegura ita nia povu no komunidade,” nia hateten.

Komandante jerál PNTL ne’e apela ba membru tomak hala’o nafatin servisu kumpre ierarkia no disiplina sai save atu lori susesu ba Instituisaun PNTL.

Faustino hato’o parabéns ba komandante EUP ho membru tomak durante tinan XI nia laran servisu hasoru dezafiu oin-oin, maibé sira nafatin iha espíritu nasionalizmu serbí nafatin Estadu no povu.

Komandu PNTL koloka ona membru UEP iha Munisípiu Bobonaro, Covalima no Oe-Cusse hodi apoia servisu PNTL munisípiu garante seguransa.

Vise Ministru Interiór, António Armindo dehan, Governu kompromete atu ajuda problema báziku ne’ebé komandu PNTL hasoru liu-liu UEP.

Nia dehan, Governu sei kontinua suporta UEP liuhusi apoiu servisu ekipamentu no kapasitasaun rekursu umanu no servisu ho dixiplina.

Governante ne’e rekoñese problema ne’ebé UEP hasoru sei buka solusaun hodi aprezenta iha Konsellu Ministru hodi tau konsiderasaun.

“Ami promete durante mandatu Governu ida ne’e, ami sei esforsu hodi tau matan ba dezenvolvimentu UEP bele kumpre nia misaun,” António hateten.

Nia dehan, Governu ne’e mós kompromete hadi’a no harii edifísiu PNTL, edifísiu UPF, reabilita salaun atendimentu Servisu Migrasaun iha fronteira no programa seluk tan.

Aniversáriu UEP ne’e, Komisáriu Faustino halo mós promosaun diviza ba membru UEP antiguidade na’in-tolu husi diviza ajente ba ajente prinsipál.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here