Profisionál Komunikasaun Sosiál hasai imajen hamutuk Sekretariu Estadu Komunikasaun Sosiál, Merício Juvinal dos Reis ‘Akara’ no Embaixadór Portugal iha Timor-Leste, José Machado Vieira, akompaña ho Adida kooperasaun Instituto Camões no Diretór CEFTEC, hafoin seremónia entre sertifikadu, iha Embaixada Portugal, sesta (14/08). Imajen Tatoli/Egas Cristovão

DILI, 14 agostu 2020 (TATOLI)-Profisionál Komunikasaun Sosiál na’in-82 simu sertifikadu lian portugés hosi projetu Consultório da Língua  para Jornalista (CLJ) iha nível B2, B2+ no Ofisina Eskrita Jornalístika, inklui entrega mós prémiu ba manan-nain hamutuk 11 ba konkursu Jornalista em Português.

Profisionál sira ne’ebé kompostu hosi jornalista no ajente ne’ebé serbisu iha órgaun Estadu frekuenta ona aula durante oras 200 ba nível B2, oras 135 ba nível B2+, no oras 100 ba Ofisina Eskrita Jornalístika.

Embaixadór Portugal iha Timor-Leste, José Pedro Machado Vieira, hateten ohin hasoru malu ho grupu ne’ebé boot oituan ho normalidade foun atu selebra konkista ida tán hosi konsultóriu.

Embaixadór Portugal iha Timor Leste, Pedro Machado Vieira. Imajen Tatoli/Egas Cristovão

“Liuhosi atibuisaun sertifikadu no atribuisaun prémiu konkursu, dala ida tan ita-nia luta alkansa liuhosi projetu ne’e,” dehan Diplomata portugés ne’e iha ninia diskursu iha seremónia atribuisaun sertifikadu, iha Embaixada Portugal, sesta ne’e.

Notísia Relevante: SEKOMS no Embaixada Portugal Asina Akordu Prolonga Projetu CLJ

Iha loron 28 maiu 2020, Governu Timor-Leste liuhosi Sekretaria Estadu Komunikasaun Sosiál (SEKOMS) no Instituto Camões liuhosi Embaixada Portugal selebra akordu ba prolongasaun projetu CLJ to’o 31 dezembru 2020. 

Embaixadór Portugal iha Timor-Leste, José Pedro Machado Vieira, entrega sertifikadu portugés ba formanda, Maria Auxiliadora. Image Tatoli/Egas Critovão

Benefisiáriu ba projetu CLJ dezde hahú iha 2016 to’o dezembru 2019 hamutuk 190 no hosi númeru ne’e na’in-40 hanesan profisionál sira ne’ebé servisu iha Governu no na’in-150 hanesan jornalista.

Enkuantu, jornalista sira ne’ebé iha ona melloramentu ba lian portugés husi projetu CLJ iha 2016 to’o 2019 hamutuk 211 no profisionál husi instituisaun Governu hamutuk 57.

“Parabéns ba ita-boot sira ne’ebé integra ona iha projetu ne’e. Aproveita mós kongratula ba órgaun komunikasaun sosiál ne’ebé frekuenta ona programa lian portugés atubele aumenta kapasidade,” nia akresenta.

Iha fatin hanesan, Sekretariu Estadu Komunikasaun Sosiál, Merício Juvinal dos Reis ‘Akara’, orgullu no apresia ho kooperasaun entre Governu Timor-Leste no Portugal iha área komunikasaun sosiál tanba lori mudansa pozitivu.

“Ita-nia jornalista ne’ebé hakerek iha lian portugés di’ak ba bebeik, tanba ne’e hakarak enkoraja formandu sira atubele kontinua fó sai notísia ho kualidade ho lian potugés, ne’ebé aposta ba formasaun hanesan agora ne’ebé ejizi tempu no konsentrasaun maka’as maibé alkansa rezultadu di’ak,” nia subliña.

Sekretariu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

Governante ne’e agradese Instituto Camões, liuliu ba formadór sira, ne’ebé implementa projetu ho dedikasaun profisionalizmu liuhosi CLJ.

“Kursu lian portugés ne’e kontribui barak iha produtu jornalista sira iha lian portugés iha territóriu Timor-Leste,” nia dehan.

Tanba ne’e, nia afirma SEKOMS iha interese ba kontinuidade projetu CLJ no aprezenta ona proposta ba kooperasaun ne’e iha tinan 2021 to’o 2023.

“SEKOMS prevee orsamentu ba projetu ne’e ho porposaun porsentu 52 no kooperasaun portugés asume partisipasaun porsentu 48. Agradese kooperasaun ne’e tanba bele asegura unilaterálmente kustu projetu ne’e,” nia akresenta.

Sekretáriu Estadu ne’e nota katak jornalista timor-oan sira iha progresu di’ak ein termu produtu jornalíztiku tanba iha vontade atu aprende.

Iha biban  simu sertifikadu ne’e, parte Embaixadór Portugal no SEKOMS entrega prémiu ba manan-nain primeiro lugar ba konkursu Jornalista em Português, Natalino Fernandes Ximenes (Jestór Rádiu Komunidade Comoro) no manan-nain seluk tán, iha kompetisaun hakarek no hatán pergunta lian portugés ho lalais via online.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here