Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 14 agostu 2020 (TATOLI)-Ministériu Obra Públika (MOP), submete ona lista tékniku Eletricidade de Timor-Leste (EDTL) inklui Diresaun Jerál Água no Saneamentu (DGAS, sigla portugés) sira ne’ebé mak kualifikadu hodi hetan suplementu remuneratóriu iha ámbitu Estadu Emerjénsia ligadu ho prevensaun COVID-19 iha Timor-Leste.

Ministru Obra Públika, Salvador Eugênio Soares dos Reis Pires, konsidera tékniku EDTL no DGAS iha mós direitu atu benefisia medida ekonómiku hosi Governu.

“Sira iha direitu ba suplementu remuneratóriu ne’e, daudaun ne’e ami trata hela dokumentu no iha ona finansa, espera katak iha tempu badak halo ona pagamentu ba sira,” informa Ministru Salvador hafoin ramata enkontru ho Primeiru-Ministru (PM), Taur Matan Ruak iha Palásiu Governu, sesta ne’e.

Tuir Ministru, tékniku EDTL sira hosi sentrál eletrisidade Hera no Betano ne’e depende ba definisaun, kuandu kualifika tuir dekretu-lei ne’ebé mak aprova iha Konsellu Ministru ba pesoál sira ne’ebé mak merese duni atu hetan duni ba supmentu remuneratóriu ne’e.

Tuir proposta MOP prevee hamutuk $100.000 ne’ebé fahe ba diresaun rua hanesan EDTL ho tékniku na’in-340 no DGAS na’in-140 no tuir kálkulu kada tékniku sei hetan subsídiu $5 loron-ida, konta husi implementasaun Estadu Emerjénsia (EE) ne’ebé liga ho prevensaun no kombate surtu COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here