Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 14 agostu 2020 (TATOLI)-Ministru Obra Públika, Salvador Eugênio Soares dos Reis Pires, klarifika katak Lei Orgánika estrutura foun Ministériu Obra Públika (MOP) foin lalais ne’ebé aprova ona, la atribui kompeténsia ba Vise MOP, Nicolau Lino Freitas Belo.

“Mudansa kompeténsia Vise-Ministru nian tuir nafatin Lei Orgánika VIII Governu, ne’ebé Vise-Ministru hanesan koajuva ba Ministru,” hateten Ministru Salvador hafoin ramata enkontru ho Primeiru-Ministru (PM), Taur Matan Ruak iha Palásiu Governu, sesta ne’e.

Governante ne’e hato’o asuntu ne’e tanba antes ne’e Vise-Ministru Nicolau Lino eziji kompeténsia própriu, tanba nia noa katak bazeia ba Lei Orgánika VIII Governu Konstitusionál fó kompeténsia tomak ba Ministru Salvador, atubele foti desizaun intermu polítika no ezekusaun tomak.

Enkuantu Vise-Ministru Nicolau, daudaun ne’e asume kompeténsia ba inspesaun no auditoria ba diresaun Bee, Estrada no sira seluk.

Notísia Relevante: Vise-Ministru Nicolau Eziji Kompeténsia Própriu

Tuir Ministru Salvador, iha orgánika foun MOP halo mudansa hanesan reforma institusionál ba diresaun jerál rua hanesan Eletrisidade, no Agua no Saneamentu, atu transforma ba empreza públika no mós harii autoridade nasionál rua hanesan eletrisidade inklui bee no saneamentu.

Nune’e mós, ho mudansa polítika halo mudansa oituan mós ba iha ba kompeténsia ministériu.

“Orgánika ministériu foin daudaun ami aprova iha Konsellu Ministru, iha mudansa nesesáriu tanba iha kompeténsia balun hanesan polítika planeamentu urbanu ordenamentu teritoriál uluk iha MOP maibé agora iha konjuntura politíka foun ne’e pasa fali ba iha Vise Primeiru-Ministru no Ministru Planu Ordenamentu”, esplika Salvador.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here