Membru PN husi Bankada FRETILIN no membru Komisaun B, David Dias Ximenes "Mandati". Imajen/ António Gonçalves

DILI, 14 agostu 2020 (TATOLI)—Komisaun B (Negósiu Estranjeiru, Defeza no Seguransa) iha Parlamentu Nasionál husu Polísia Nasionál Timor-Leste (PNTL) atu buka-tuir autór sira-ne’ebé envolve iha kazu sunu uma ne’ebé akontese iha Suku Nunira, Postu Administrativu Laga, Munisípiu Baucau.

Notísia Relevante: Asaltu iha Nunira, sunu uma-12 no na’in-rua kanek

Kazu sunu-uma ne’e akontese iha Aldeia Uasilawa, Suku Nunira, Postu Administrativu Laga, Munisípiu Baucau. Kazu ne’e akontese iha loron kinta (13 agostu 2020) madrugada, tuku 04:00 ne’ebé rezulta uma 12 sunu-mutuk no ema na’in-rua kanek.

Membru Komisaun B, Deputadu David Diaz Ximenes “Mandati”, husu autoridade seguransa iha komandu PNTL Munisípiu Baucau atu buka tuir grupu organizadu sira-ne’ebe halo brutalizmu no sunu komunidade nia uma inklui motorizada ida iha Laga.

“Parte seguransa liuliu ba komandu polísia Baucau tenke identifika ona grupu ne’ebé halo fali dezorden publiku ida-ne’e,”  Deputadu Mandati  informa ba jornalista sira iha resintu Parlamentu Nasionál, sesta ne’e.

Membru Komisaun B ne’e esplika, lei dehan ema ida labele iha autoridade halo Justisa ba nia liman rasik, se iha krime ida ba halo tán krime seluk ne’e labele rezolve problema.

“Ita ema ne’e iha direitu auto defeza ne’e loos, maibé auto defeza labele kria instabilidade ba sosiedade iha fatin ruma. Ha’u hanoin ho akontesimentu sira hanesan ne’e Governu tenke hanoin fali ona,” nia dehan. 

Nia haktuir, polísia tenke halo operasaun hodi identifika ba fatin sira-ne’ebe risku relasaun ho kazu ne’ebé akontese iha Suku Nunira, Postu Administrativu Laga ne’e.

Nia fundamenta, povu hakarak moris hakmatek, hakarak moris armonizada, labele husik povu ne’e halai tún-sa’e tanba ho grupu ida-nia hahalok hodi estraga no sunu mutuk povu nia uma ne’e hanoin ladi’ak.

Nia husu Governu tenke halo resensiamentu ba ezisténsia arte-marsiál sira iha Timor laran tomak, tenke halo kontrolu ba fatin sira ne’ebé sira halo treinamentu ba para depois treinu iha ema ruma tenke iha responsabiliza, labele ema seluk mak responsabiliza fali sala ne’e.

Jornalista : Evaristo Soares Martins

Editór       :  Cancio Ximens

HAKEREK NO HATÁN

Please enter your comment!
Please enter your name here