Jurista Timoroan, Avelino Coelho. Imajen/Dok.Tatoli

DILI, 14 agostu 2020 (TATOLI)-Eis Sekretáriu Estadu Konsellu Ministru, Avelino Coelho, hateten joven sira iha papel importante atu transforma sosiedade, polítiku, ekonómiku hodi apoiu prosesu dezenvolvimentu.

Avelino Coelho, hato’o opiniaun ne’e bainhira sai oradór iha semináriu kona-ba konsolidasaun demokrasia, páz, no estabilidade ba dezenvolvimentu nasionál relasiona ho situasaun polítika ne’ebé akontese iha rai-laran, ne’ebé maka organiza husi Grupu Estudante Peskizadór ba Asuntu Governansaun (GEPAC) husi Universidade Nasionál Timor-Leste (UNTL).

“Joven sira mak sai pilares importante atu transforma sosiadade, transforma sistema polítika,  ekonómiku hodi lori povu moris hakmatek,” dehan nia iha salaun Fakuldade Siénsia Polítika UNTL, Caicoli Dili.

Jurista Timoroan ne’e dehan joven mós sai matadalan ba jerasaun tuan sira atu transforma idea para kontribui ba prosesu dezenvolvimentu.

“Koñesimentu, esperénsia mak sai fundamental ba partisipasaun joven sira-nian iha futuru, liliu iha prosesu konstrusaun  Estadu no rekonstrusaun Nasaun Timor-Leste,” tenik tan.

Nia konsidera semináriu ne’e importante tebes atu tulun Orgaun Soberanu sira atu idaidak hatene ninia dever no responsabilidade hodi aselera dezenvolvimentu.

“Tema ne’ebé ita nia alin sira koloka relevante tebes, kuandu ita ko’alia konstrusaun  Estadu ita ko’alia relasionamentu entre orgaun soberania, ita ko’alia oinsá ema ida atu ba ukun no oinsá dezenvolvimentu ida atu la’o tenki iha nafatin diskusaun hanesan ne’e atu kontinua bebeik,” dehan nia.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here