Xefe Gabinete Primeiru-Ministru, Azevedo Marçal. Imajen/Osória Marques.

DILI, 14 agostu 2020 (TATOLI)–Xefe Gabinete Primeiru-Ministru (PM), Azevedo Maçal, hateten Governu kontinua reforsa programa prioridade Centro Nacional Chega (CNC) iha pontu ka progama haat (4) liuliu kona-ba prezerva memória istória pasada nian.

Notísia Relevante: CNC Promove Memória Pasada no Asegura Rekomendasaun “Chega!” no “Per Memoriam Ad Spem”

“Memória pasadu ne’e ita atu iha kestaun valór istóriku no valór ekonómiku nian. Bainhira temi valór istóriku mak signifika rikeza Timor-Leste nian ne’ebé tenke kontinua promove. Tanba ne’e, husu ba ministériu relevante hotu atu sira mós tenke kontinua reforsa koordenasaun servisu para ita bele asegura ita-nia valór patrimóniu istóriku ne’ebé mak ita iha,” dehan efe Gabinete Primeiru-ministru (PM), Azevedo Maçal, hafoin hala’o abertura ba enkontru  CNC ho parseiru estatéjiku sira kona-ba progressu no planu implementasaun reklamasaun CAVR “Chega!” no CVA “Per memoriam Ad Spem”, iha Antigu Komraka, Balide, Dili, sesta ne’e.

Xefe Gabinete ne’e hatutan, valór ekonómiku hodi haree ba papel Ministériu Turizmu atu oinsá mak bele promove fatin turizmu sira iha Timor ne’e, hodi nune’e sai mós hanesan fonte-reseita ba estadu Timor-Leste tanba ne’e presiza tau atensaun.

Programa daruak, nia dehan, mak mapamentu sítiu istóriku ne’ebé mak CNC identifika sítiu hamutuk 20-resin ne’ebé presiza koordena ho ministériu relevante sira hotu atu oinsá mak bele dezenvolve sítiu istóriku sira.

Programa datolu, tuir haktuir, mak estabelesementu legál kona-ba bainhira identifika hotu ona fatin sítiu istóriku no prezerva ona memória pasadu mak presiza halo dalan legál ida para proteje sasán hirak ne’e.

“Bainhira ita identifika hotu ona no prezerva ona mak tenke buka meiu ida no presiza ita hotu-hotu servisu hamutuk hodi proteze no promove. Tanba ne’e mak presiza enkuadramentu legál ida para asegura,” Xefe gabinete ne’e hateten.

Nia dehan, programa dahaat mak oinsá atu introdús Centro Nacional Chega (CNC) no Comissão Verdade e Amvizade (CV) hodi hatama ba iha kuríkulu ba eskola sira no oinsá métodu hanorin ne’ebé mais interativu, atrativu para ema hakarak rona no hatene.

“Ita labele hanorin de’it estudante sira iha klase laran. Maibé, presiza lori sira ba fatin istóriku sira para sira mós hatene ninia realidade akontesementu liuliu envolve mós vítima sira ne’ebé mak sofre ba akontesementu ba pasadu nian para esplika ba estudante sira nune’e bele komprende,” nia dehan.

Tanba, tuir nia, presiza esplika ein termu kuríkulu no metodolojia hanorin ne’ebé mak inovativu liu no liuhosi ne’e mak bele promove di’ak liután, maibé presiza ministériu relevante ne’ebé mak liga ba asuntu CNC nian hodi kolabora hamutuk para bele dezenvolve.

“Tanba ne’e mak gabinete PM hakarak apoiu másimu, para ita bele promove di’ak liután ita-nia patrimóniu. Gabinete nia prezensa ne’e hodi fó apoiu malu no apoiu polítiku para implementasaun programa CNC nian bele susesu no promove di’ak liután,” nia esplika.

Notísia Relevante: CNC-FM asina nota entendementu halo monitorizasaun ba seguransa-defeza

Jornalista : Osória Marques

Editór         :  Cancio Ximens

HAKEREK NO HATÁN

Please enter your comment!
Please enter your name here