Ilustrasaun labele fuma

DILI, 14 agostu 2020 (TATOLI)-Rezultadu peskiza husi Aliánsa Nasionál Kontrolu Tabaku ba Munisípiu Dili no Ermera deskobre sidadaun sira sei kontinua fuma iha fatin públiku hanesan transporte laran, edifísiu públiku, merkadu, fatin desportu, fatin rekreativu no seluk tan.

Maski Dekretu Lei kontrolu tabaku númeru 14/2016 regula sirkulasaun tabaku iha rai-laran no bandu atu labele fuma iha fatin públiku sira.

”Aliansa Nasionál Kontrolu Tabaku halo peskiza ba fatin públiku sira tuir lei katak proibidu fuma entaun peskiza  ne’e rasik ami halo iha Munisípiu rua Dili no Ermera no amostra rihun ida liu hitu no hatudu katak 74% fuma iha fatin publiku,” relata Jestór Aliansa Nasionál Kontrolu Tabaku, Sancho Belito Fernandes, bainhira fó sai relatóriu peskiza ne’e iha Otél Vila-Verde, sesta ne’e.

Rezultadu husi implementasaun Dekretu-Lei ne’e seidauk másimu tanba pursentajen populasaun maioria sei nafatin fuma iha fatin públiku sira.

”Ami iha planu ona atu peskiza hotu bá Munisípiu sira seluk maibé ami mós iha limitasaun rekursu, ami hanoin daudaun ba futuru depois prepara rekursu no bele haree hotu ba Munisípiu sira hotu iha Timor-Laran tomak,” tenik tan.

Baseia ba peskiza, fatór risku ba moras la hada’et iha Timor-Leste hatudu katak ema adultu tinan 18 to’o 69 fuma 70% no labarik idade 13 to’o 15 ne’ebé fuma 35%.

Atu kontrola sidadaun sira labele fuma iha fatin públiku, nu’udar kn’ar ida mós ba Autoridade Munisipál sira atu halo kontrolu no la’ós servisu Ministériu Saúde ninian mesak.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here