Unidade Espesiál Polísia (UEP) hala'o atraksaun bainhira komemora aniversariu UEP ba dala-XI iha Kuartél UEP, Bairru-Pité, Dili, 14 agostu 2020. Imajen/Antonio Goncalves

DILI, 14 agostu 2020 (TATOLI)- Komandu Polísia Nasionál Timor-Leste (PNTL) liuhusi Seksaun Explosive Ordinance Disposal, Unidade Espesiál Polísia (EOD-UEP), ba tinan ne’e, simu tan proposta 20-resin husi autoridade suku sira atu halo destruisaun  ba materiál explozivu hanesan, granada morteiru, kilat musan, granada liman no materiál funu sira seluk tan ne’ebé povu sira hetan no sei ativa hela.

Notísia Relevante : EOD-UEP Destrui Materiál Explozivu 50-Resin

Komandante Seksaun EOD-UEP, Sarjentu Xefe, Estaqui de Jesus Ximenes dehan, sira-nia parte simu ona orden husi Komandante Jerál PNTL, Komisáriu Faustino da Costa, atu bele ba munisípiu hodi destrui materiál explozivu sira ne’ebé povu hetan husi segundu guerra mundiál to’o funu 1975 nian.

“Ami hetan ona despaxu husi komandante jerál atu ba halo destruisaun ba materiál explozivu hamutuk 20-resin ne’ebé ita-nia komunidade sira hetan kuaze balun sei ativu hela no balun rai hela iha komandu polísia munisípiu sira,” informa Sarjentu Xefe, Estaqui de Jesus Ximenes, ba Agência Tatoli, ohin, iha edifísiu UEP, Bairru-Pité, Dili.

EOD-UEP rasik preokupa materiál explozivu sira ne’ebé komunidade sira hetan perigu tebes ba komunidade sira-nia vida no tenke ba harahun ona, maibé tanba EOD-UEP menus ekipamentu no la iha transporte no kombustivel atu ba munisípiu, nune’e halo servisu tenke paradu.

“Materiál sira ne’e perigu tebes, tanba povu balun menus informasaun lori ba rai fali iha sira-nia uma no dala ruma ativu bele rebenta,” nia hateten.

Nia hatutan, nu’udar ema tékniku sira prontu atu ba munisípiu atu halo destruisaun, maibé haree ba farda no ekipamentu ne’ebé ekipa EOD-UEP iha balun komesa aat no labele utiliza ona hodi labele afeta ba membru sira-nia vida.

Komandante Seksaun EOD-UEP, Estaqui hatutan, materiál explozivu sira-ne’e presiza halo destruisaun hodi evita komunidade sira labele utiliza ekipamentu ne’e ba halo fali problema no krime ruma ne’ebé bele fó perigu ba ema seluk nia vida.

Iha parte seluk, Komandante UEP Superintendente Xefe Orlando Gomes husu atensaun ba Komandante Jerál PNTL, Komisáriu Faustino da Costa, atu tau konsiderasaun hodi fó apoiu ba servisu EOD-UEP atu dezloka urjénsia ba munisípiu, Lautem, Covalima, Ermera, Baucau, no Bobonaro, hodi halo destruisaun ba materiál explozivu sira ne’e.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here