Diretur Ezekeutivu Centro Nacional Chega (CNC). Imajen/Media CNC.

DILI, 14 agostu 2020 (TATOLI)–Centro Nacional Chega (CNC) halo koordenasaun ho liña ministeriál ba planu programa CNC nian hodi evita labele mosu servisu duplikasaun ba programa ida.

Notísia Relevante: Governu reforsa programa prioridade CNC hodi prezerva memória istória pasada

“Ohin ne’e ita atualiza servisu hirak ne’ebé mak durante hala’o ona entre CNC ho liña ministeriál. CNC halo koordenasaun ho liña ministeriál para depois evita duplikasaun no evita mós hadau malu programa. Tanba, orsida dehan ida-ne’e mak halo no ida ne’ebá mak halo. Tanba ne’e mak ohin halo enkontru ida ho parseiru estratéjiku sira”, dehan Diretór Ezekutivu CNC, Hugo Maria Fernandes, ba jornalista sira hafoin halo abertura enkontru CNC ho parseiru estatéjiku sira kona-ba progresu no planu implementasaun reklamasaun Chega! no CVA, iha Antigu Komarka, Balide, sesta ne’e.

Nia informa, enkontru CNC ho parseiru estatéjiku sira kona-ba progresu no planu implementasaun inklui halo avaliasaun ba ministériu ida ne’ebé mak hala’o servisu di’ak ona no ida ne’ebé mak sei hasoru dezafiu.

Tanba ne’e, nia dehan, planu ba oin mak atu servisu hamutuk iha parte ne’ebé de’it, klaru ministériu sira ne’ebé mak mai ne’e maioria halo akordu ho CNC hanesan Ministériu Edukasaun Joventude no Desportu (MEJD).

Hugo informa, iha tinan kotuk CNC halo ona elaborasaun kuríkulu ba matéria rua mak kuríkulu istória no kuríkulu edukasaun sívika sidadania, direitu umanu, partikularmente ba nivel eskolaridade terseiru siklu no eskola sekundária sira. Nia dehan, prosesu sei la’o hela no hein katak tinan oin bele ramata ona.

Tuir Hugo Fernandes, CNC seidauk halo parséria ho Ministériu Turizmu maibé dezde tinan rua (2) liubá iha ona koordensaun bainhira turista sira mai vizita fatin turizmu ne’e.

“Entaun ho ne’e ba oin ita haree oinsá mak entre CNC ho Ministériu Turizmu iha kooperasaun”, nia dehan. 

Aleinde ne’e, nia haktuir, durante ne’e CNC halo ona mapamentu iha munisípiu neen Dili, Aileu, Ainaru, Baukau, Manatutu, no Baukau foin mak halo metade, tanba tuir loloos halo hotu ona maibé tan osan duodésimu no COVID-19 seidauk bele ramata.

“Hosi munisípiu neen kuaze ita identifika ona sítiu hamutuk 61 ne’ebé mak ita hahú hakerek istória breve no video para introdús katak ne’e istória saida. Ida-ne’e hanesan dalan ida hodi promove fatin turizmu”, nia dehan. 

Iha parte seluk, nia informa, durante ne’e Ministériu Solidaridade Sosiál no Inkluzaun (MSSI) mós fó apoiu, ezemplu halo reunifikasaun ba ema ka timoroan sira ne’ebé lakon sira ne’ebé mak lori hosi Indonézia mak mai.

“Agora daudaun ne’e vítima sira liuhosi CNC, organizasaun sosiedade sivíl. Durante ne’e, CNC servisu hamutuk ho liña ministeriál hotu no organizasaun sosiedade sivíl sira atu oinsa mak bele dezenvolve programa ne’ebé mak CNC implementa ona”, nia dehan.

Jornalista : Osória Marques

Editór         :  Cancio Ximens

HAKEREK NO HATÁN

Please enter your comment!
Please enter your name here