Komemora loron Mundial Juventude sira halao marsa husi Palacio governu nia oin ba to iha Xanana Reading Room Lecidere, Kuarta 12 Agostu 2020.Imajen/Antonio Goncalves

DILI, 13 agostu 2020 (TATOLI)-Youth Community Care (YCC) husu ba joven sira atu hatoman a’an ho le’e barak  hodi transforma idea no planu di’ak ba kontribui prosesu dezenvolvimentu nasaun nian.

Koordenadór YCC, Camilo de Fátiima, hato’o mensajen ne’e durante kampaña kona-ba importansia le’e ho tema “Hakbi’it Foinsa’e Sira Liuhosi Kultura Le’e” ho atividade marsa la’o ain husi Jardim Palacio do Governo ba to’o Largo Lecidere Dili, hodi selebra loron mundiál Juventude ne’ebé monu iha loron 12 fulan-agostu, kuarta ne’e.

“Ohin ami juventude sira halibur malu realiza eventu ida ne’e hodi foka sai ba maluk juventude sira importansia saida mak juventude sira atu halo ba rai ne’e atu nune’e sira bele fahe tutan importansia ne’e ba maluk sira seluk,” dehan nia iha Largo Lecidere Dili.

Notísia Relevante :Timoroan tenki hatoman a’an ho kultura le’e

Tuir nia importansia husi kampaña ne’e atu fó korajen ba foinsa’e sira para fó importansia ba kultura le’e barak.

Iha fatin hanesan Estudante Universidade Orientál (UNITAL), Benvinda Pinto, reforsa hanesan joven tenki tranforma a’an sai hanesan lalenok ba ema seluk atu fihir sira-nia a’an para bele kontribui ba prosesu dezenvolvimentu.

“Ha’u husu ba maluk joven sira katak hakarak sai ema ne’ebé bele partisipa iha dezenvolvimentu rai ida ne’e nian tenki prepara a’an ho didiak liuhusi badinas le’e barak,” nia hatutan.

Notísia Relevante :Xanana Lansa Biblioteka Movel Atu Hamoris Kultura Lee Iha Timor-Leste

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here