Diretora Jerál Asuntu ASEAN, Milena Rangel.Imajen: Nelia Fernandes

DILI, 13 agostu 2020 (TATOLI)-Diretora Jerál Asuntu ASEAN Ministériu Negósiu Estranjeiru no Kooperasaun, Milena Rangel, hateten Governu halo ona preparasaun ba pilár ekonomia no sosiu kultura ho másimu.

Nia dehan preparasaun ba pilár rua ne’e la’o di’ak, tanba MNEK hala’o servisu ho liña ministeriál sira hotu hodi fó resposta ba kestionáriu ne’ebé maka Sekretariadu ASEAN aprezenta ba TL liliu kona-ba servisu saida maka halo ona no seidauk halo.

Notísia Relevante :ASEAN avalia Timor-Leste liuhosi telekonferensia

Tuir planu Ekipa Tékniku husi Sekretariadu ASEAN sei halo avaliasaun ba Timor-Leste iha pilár ekonomia no sosiu kultura iha fulan-setembru 2020 liuhosi telekonferénsia.

“Ba ita-nia preparasaun adezaun nian agora dadauk ekipa prepara hela atu halo virtual meeting ho Sekretariadu ASEAN hosi Jakarta liliu atu haree liu ba iha pilár sosiu kultura no ita konkorda ona ho sira, enkontru ne’e sei akontese iha semana ikus fulan-agostu ne’e ka semana dahuluk fulan-setembru,” dehan Milena ba Jornalista sira iha edifísiu MNEK Praia dos Coqeiros, kinta ne’e.

Tuir loloos Ekipa avaliadór husi ASEAN halo ona avaliasaun ba TL ninia preparasaun iha pilar ekonomia no sosiu kultura iha fulan-maiu liubá maibé tenki adia tanba pandemia globál COVID-19.

“Covid-19 mak la favorese tempu di’ak ba ita la fó oportunidade di’ak para halo misaun esploratoria enkontru hasoru malu, entaun ita tenke liu de’it husi virtual meeting, mak dada to’o ohin loron,”  katak nia.

Diretora ne’e hatutan ekipa avaliasaun sei halo avaliasaun uluk ba pilár sosiu kultura depois maka ekonomia.

Notísia Relevante :Singapura Apoiu Misaun Avaliasaun Adezaun TL Nian ba ASEAN

Iha pilár ekonomia ASEAN haree jeralmente maka oinsá Timor-Leste ninia preparasaun ba enkudramentu legál hodi halo komérsiu no investimentu ba futuru.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here