Membru VIII Governu hamutuk 43 hasai Fotografia ho Prezidente Repúblika, Francisco Guterres ‘Lú Olo’, hafoin membru na’in-21 simu pose, iha Palásiu Prezidensiál, Bairro Pité, kuarta (24/06). Imajen Tatoli/António Gonçalves

DILI, 13 agostu 2020 (TATOLI)-Primeiru-Ministru (PM), Taur Matan Ruak,  hateten seidauk to’o tempu atu halo avaliasaun ba membru VIII Governu Konstitusionál tanba balun foin asume responsabilidade.

Xefe Governu hato’o asuntu ne’e hodi responde preokupasaun sidadaun sira, kona-ba kapasidade membru VIII Governu Konstitusionál, hafoin enkontru semanál ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité.

“Sira (membru Governu) foin tama fulan-ida, ko’alia ona kapasidade ne’e, Primeiru-Ministru anota preokupasaun sidadaun sira nian, maibé avaliasaun to’o tempu mak sei halo no agora ne’e seidauk,” tenik PM Taur hodi hatan pergunta jornalista sira, kinta ne’e.

Antes ne’e, Xefe Estadu husu ba membru Governu na’in-21 ne’ebé foin simu psse atu serisu ho efisiensia no efikásia atu fó moris di’ak ba povu.

“Ha’u hakarak  ko’alia ho neon nakloke ba imi hotu. Hili ekipa di’ak ida sai fatór importante ba susesu, maibé ida-ne’e de’it  la to’o atu hetan susesu. Atu hetan susesu, Governu tenke iha kompeténsia, kapasidade, responsabilidade, dedikasaun no dezempeñu ho efikásia. Ha’u ko’alia kona-ba efikásia, efisiénsia no sustentabilidade,”  Xefe Estadu fó hanoin liuhosi diskursu iha serimónia pose ba membru Governu na’in-21 iha Palásiu Prezidensiál iha fulan hirak liubá.

Prezidente Repúblika fó pose ba membru Governu Konstitusionál na’in-21 ne’e, liuhosi Dekretu Prezidente Repúblika,  númeru 53/2020 no uza kompeténsia konstitusionál tuir artigu 106 númeru 2, hafoin nomea Vise Primeiru-Ministru no Ministru Planu no Ordenamentu José Maria dos Reis,  Ministru Koordenadór Asuntu Ekonómiku Joaquim Amaral, Ministra Negósiu Estranjeiru no Kooperasaun, Adaljiza Albertina Xavier Reis Magno, Ministru Edukasaun, Juventude no Desportu, Armindo  Maia,  Ministru Turizmu, Komérsiu no Indústria José Lucas do Carmo da Silva, Ministru Interiór Taur Matan Ruak, Ministru Petróleu no Minerál Víctor da Conceição Soares.

Nune’e mós, Xefe Estadu fó pose ba   Vise-Ministru Negósiu Estranjeiru no Kooperasaun Julião da Silva, Vise-Ministru Justisa José Edmundo Caetano,  Vise-Ministru Administrasaun Estatál Lino de Jesus Torrezão, Vise-Ministru Saúde Bonifacio Mau Coli dos Reis, Vise-Ministru Edukasaun, Juventude no Desportu António Guterres, Vise-Ministru Komérsiu no Indústria, Domingos Lopes Antunes, Vise-Ministra Turizmu Komunitária no Kulturál, Inâcia da Conceição Teixeira, Vise-Ministru Agrikultura no Peskas Abilio Xavier de Araújo, no Vise-Ministru Interiór Antonino Armindo.

PR Lú Olo mós fó pose ba Sekretáriu Estadu Formasaun Profisionál no Empregu Alarico de Rosário, Sekretáriu Estadu Kooperativa Elizário Ferreira, Sekretáriu Estadu Peska Elídio de Araújo, Sekretáriu Estadu Juventude no Desportu Abrão Saldanha, Sekretáriu Estadu Protesaun Sivil Joaquim José Gusmão dos Reis Martins.

Prezidente Repúblika fó pose ba membru Governu dala-rua ona, pose dahuluk ba membru Governu na’in-ualu no daruak fó ba membru Governu na’in-21, nune’e totál membru VIII Governu Konstitussionál hamutuk na’in-43.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here