Primeiru-Ministru, Taur Matan Ruak. Imajen Tatoli/Egas Cristovão

DILI, 13 agostu 2020 (TATOLI)-Primeiru-Ministru (PM), Taur Matan Ruak, hateten elaborasaun Orsamentu Jerál Estadu (OJE) 2020 daudaun ne’e sei bazeia ba planu rekuperasaun ekonómika.

“Ita sei bazeia ba planu no rekomendasaun no ministériu sira sei prepara sira-nia programa, planu atividade sira hodi aprezenta no aloka orsamentu  iha 2021,” tenik Primeiru-Ministru (PM), Taur Matan Ruak, hafoin enkontru semanál, iha Palásiu Prezidensiál, Bairro Pité, kinta ne’e.

Daudaun ne’e Governu kontinua konvoka reuniaun ho ministériu sira ne’ebé toma konta ba área ekonomia hodi haree setór prioritáriu sira ba rekuperasaun ekonomia.

“Iha rekomendasaun ba perioridade  hanesan agrikultura, turizmu, saúde, edukasaun, inklui reforma institusionál.  Área lima ne’e sira fó atensaun maka’as loos ne’ebé prioridade hirak ne’e ita sei diskute hafoin halo revizaun orsamentu,” nia akresenta.

Planu rekuperasaun ekonómika ne’e ho objetivu ba rekuperasaun ekonómiku ba pós COVID-19, ne’ebé fahe ona ba área no setór prioritáriu sira.

Setór prioritáriu sira hanesan iha agrikultura, turizmu, abitasaun, kapitál umanu (edukasaun, saúde no protesaun sosiál), no iha reforma institusionál.

Planu ne’e propoin hosi Komisaun ba Elaborasaun Planu Rekuperasaun Ekonómika nian, ne’ebé hahú ninia funsaun iha loron 18 juñu 2020, ho misaun fó rekomendasaun ba Konsellu Ministru (KM), kona-ba medida sira hodi halo aprovasaun no asaun hodi ezekuta iha rekuperasaun ekonomia nasionál ninia.

Nune’e, bele define prioridade sira ne’ebé klaru kona- ba investimentu no garantia konsensu posível sosiedade nian ne’ebé boot, iha área prinsipál investimentu nian.

Entretantu, iha diskusaun jornada Orsamentál 2021, Ministériu Finansa (MF) aprezenta senáriu haat ba tetu fiskál OJE 2021, hodi kada ministériu no ajénsia Estadu sira tetu hodi halo planu prioridade.

Senáriu dahuluk, sénariu sustetável aumenta reseita naun petrolieru ho nia montante millaun $724,4 ho vizaun ida katak fundu petrolíferu ne’e lori tinan naruk mak hotu ne’ebé sei la foti liu Rendimentu Sustentável Estimadu (RSE).

Daruak, sénariu moderadu ho nia montante OJE 2021 billaun $1,309  ne’ebé défise ajustadu ho RSE millaun $585,2 ho previzaun fundu Mina rai sei hotu iha tinan 2045.

Datoluk, sénariu ne’e a’as oituan ho montante OJE 2021 billaun $1.600 ne’ebé ajusta ho RSE millaun $711,0 ho privizaun fundu mina-rai ramata iha tinan 2037.

Senáriu  ikus liu, ho montante OJE 2021 billaun $1,782,9 ne’ebé ajusta mós RSE millaun $890,9 ho previzaun fundu minarai remata iha tinan 2039.

Programa no planu sira  VIII Governu ninian no tetu fiskál OJE 2021 ho baze ba Planu Estratéjiku Dezenvolvimentu Nasionál (PEDN) períodu 2011 too 2030.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here