Ministru Asuntu Parlamentár no Komunikasaun Sosiál, Francisco Jerónimo. Imajen Tatoli/Egas Cristovão

DILI, 13 agostu 2020 (TATOLI)—Relasiona ho deputadu balun kestiona lei sistema saúde no lei migrasaun no azilu ne’e Governu seidauk aprezenta maibé, ohin, Ministru Asuntu Parlamentár no Komunikasaun Sosiál (MAPKOMS), Francisco Jerónimo, atualiza ba Prezidente Parlamentu Nasionál, Deputadu Aniceto Guterres, katak lei rua ne’e submete ona ba PN antes resesu.

“Ha’u mai enkontru ho Prezidente Parlamentu Nasionál  hodi haree fali lei sira-ne’ebé mak deputadu sira kestiona kona-ba lei sistema saúde, lei migrasaun seidauk hodi mai Parlamentu Nasionál, dehan Governu la halo preparasaun. Tanba ne’e, ha’u mai fali hasoru Prezidente Parlamentu Nasionál hodi fanun fali katak lei sira-ne’e ami haruka mai hotu ona iha Parlamentu Nasionál antes resesu,” Francisco Jerónimo informa ba jornalista sira, iha Parlamentu Nasionál, kinta ne’e.

Ministru Francisco Jerónimo atualiza lei refere ba PPN tanba deputadu balu ladún entende no la akompaña didi’ak lei sira ne’ebé antes resesu ne’e Governu aprezenta ba Parlamentu Nasionál.

“Ha’u mai fali ho Prezidente Parlamentu Nasionál hodi fó hanoin katak lei sira-ne’e lori mai tiha ona, lei ne’e kona-ba lei migrasaun no azilu no mós sistema saúde ne’ebé mak engloba iha laran, atu halo oinsá mak foti desizaun bainhira ita iha kalamidade ka iha situasaun surtu COVID-19 hodi fó baze legál ba Governu atubele halo asaun ruma hodi limita sidadaun sira-nia sirkulasaun kuandu moras sira akontese,” nia dehan. 

Nia hateten, lei sira-ne’e submete ona ba PN maibé deputadu sira iha hela resesu be sira la haree, tanba bainhira Governu aprezenta Estadu Emerjénsia mai debate iha Parlamentu Nasionál, deputadu sira iha debate ho Primeiru-Ministru dehan fali Governu dseidauk lori mai.

“Tanba ne’e mai atu koordena fali ho Prezidente Parlamentu Nasionál hodi dehan katak lei ne’e submete ona ba PN antes resesu. Ne’ebé, oinsá atu konvida fali deputadu sira hodi diskute, molok Estadu Emerjénsia ne’e ramata iha loron 4 setembru la presiza tan entaun haruka Prezidente Repúblika promulga hodi lalika hamosu tan Estadu Emerjénsia foun. Se ramata mak laiha, ami tenke haree fali alternativa seluk”, nia informa. 

 Jornalista : Evaristo Soares Martins

 Editór       :  Cancio Ximenes 

HAKEREK NO HATÁN

Please enter your comment!
Please enter your name here