Aprezentasaun Grupu Korál Parókia Santa Terezinha do Meninho Jesus Quelicai. Imajen/Kontribuidór: Pe. Apai Costa, SDB.

DILI, 13 agostu 2020 (TATOLI)—Membru Juri ba Kompetisiaun Grupu Korál, Pe. Aderito Manuel Euclides Victor da Costa, SDB, informa grupu korál estasaun Bucoli mak sai primeiru lugar iha kompetisaun grupu korál ba serimónia re-inaugurasaun ba igreja Parókia Santo António Baucau no komemorasaun festa misaun Baucau ka Santo António nia aniversáriu ba dala-825 (15 agostu 1195-15 agostu 2020).

Notísia Relevante: Sarani Baucau la’ós “muturabu” maibé “muturau”

Amo Aderito Victor hatutan, Parókia Santo António Baucau iha nia estasaun hanesan estasaun misionáriu Parókia Santo António Vila-tuan no Vila-nova Baucau, misionáriu Venilale, Quelicai, Laga, no Bucoli (Vemase) maibé sira hirak ne’ebé konkorre ne’e iha grupu lima (5) mak hanesan estasaun Bucoli, Parókia Vila-nova Baucau, grupu Santo António Baucau, estasaun Buibau no Parókia Quelicai.

Grupu Korál estasaun Bucoli sai Primeiru Lugar hasai retratu hamutuk ho Pároku Paeókia Baucau, Pe. Maneuel da Silva Ximenes, no Koordenadór Grupu Korál estasaun Bucoli, Eufrásio da Silva. Imajen/Kontribuidór: Cardoso Sarmento Freitas.

“Hosi grupu korál lima (5) ne’ebé tuir kompetisaun grupu korál ne’e, grupu korál estasaun misionáriu Bucoli mak sai primeiru lugar ho valor 4463, segundu lugar grupu korál hosi Parókia St. Antonio Baucau ho valór 4347, no terseiru lugar hosi Parókia Santa Terezinha do Meninho Jesus Quelicai ho valór 4314,” Pe. Aderito Manuel Euclides Victor da Costa, SDB, informa ba Agência TATOLI liuhosi telefonika, kinta ne’e.

Hosi valor hirak ne’e, Amo Aderito hateten, bazea ba kritériu avaliasaun ba dahuluk mak grupu korál aprezenta sira-nia grupu, oinsá grupu nia movimentasaun bainhira hakat ba palku, mentalidade mak oinsá sira atrai audiénsia no domina palku inklui tenke domina múzika.

Kriteria avaliasaun daruak, nia haktuir, vistuáriu grupu korál nian mak feto sira tenke uza kabaia maibé faru liman naruk no ba mane sira uza kalsa, kazaku, gravata no sapatu kór-metan tantu feto-mane.

Amo haktuir, avaliasaun datoluk mak espresaun muzikál ne’ebé halai liu ba tékniku vokál sopranu, alto, tenor no baixu, no espresaun muzikál halai ba dinámiku mak iha pianu no shorte.

Kriteira avaliasaun dahaat, amo esplika, mak tonalidade no dalima mak kualidade vóz no ikus liu mak dirijente tenke domina múzika no tempu.

“Ami-nia avaliasaun hodi fó valór ba sira-nia kompetisaun ba grupu vokál ne’e halai liu ba tékniku vokál para oinsá ita mós bele prodús artista di’ak ba hananu nian,” amu Aderito hateten.

Amululik Aderito Victor esplika, iha kompetisaun grupu korál ne’e, grupu korál sira aprezenta no hananu múzika obrigatoriu no muzika eskollidu ne’ebé komisaun organizadora sira prepara mak múzika obrigatóriu ho títulu “Baucau Rai Lulik” no múzika eskollidu mak “Ami Hananu” no “Viva Santo Antonio”.

“Ami-nia objetivu garuka grupu korál sira hili múzika obrigatóriu no eskollidu sira-ne’e, tanba bele sadik grupu korál hirak ne’e oinsá sira bele aprende no bele domina hotu múzika sira ne’e,” nia dehan.

Entretantu, Koordenadór Grupu Korál estasaun Bucoli, Eufrásio da Silva, haktuir sira sente kontente tanba bainhira sira rona rezultadu katak sira-nia grupu mak sai manan na’in ba kompetisaun grupu korál entre grupu lima iha Baucau ne’ebé tuir kompetisaun refere.

Hafoin anunsia reultadu kompetisaun hosi ekipa juri, grupu korál sira hamutuk kaer liman hodi tebe dahur. Imajen/Kontribuidór: Cardoso Sarmento Freitas.

“Nu’udár koordenadór, ha’u sente kontente tebes ho rezultadu ne’ebé mak juri sira fó mai ami no ho valór ne’ebé mak satisfeitu tebes tuir ami-nia hakarak. Tanba, ami-nia preparasaun durante semana tolu (3) nia-laran ba treina múzika ne’e, nakonu ho esperasan. Katak, ami mak sei manan,” nia dehan ba Agênsia TATOLI via telefonika, kinta ne’e.

Nia informa, iha kompetisaun grupu korál ne’e ninia grupu estasaun Bukoli hili múzika obrigatóriu mak “Baucau Rai-Lulik” no múzika eskollidu mak “Viva Santo António” ho ninia membru grupu korál hamutuk na’in-25 kompostu hosi mane na’in-sia (9) no feto hamutuk na’in-16.

Ekipa juri ba kompetisaun grupu korál ne’e kompostu hosi ema na’in-tolu (3) mak hanesan Pe. Aderito Manuel Euclides Victor da Costa, SDB, Madre Martinha hosi Sta. Ursula no professor Avelino Gaio.

Serimónia ne’e hetan partisipasaun hosi Prezidente Administradór Munisípiu Baucau, António Guterres, Pároku Parókia Baucau, Pe. Manuel da Silva Ximenes, komandante operasionál Baucau, administradór, xefe suku Bucoli, no sarani sira.

Notísia Relevante: Sarani Buibau prontu simu ilas Santo António

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here