Primeiru-Ministru, Taur Matan Ruak. Imajen Tatoli/Egas Cristovão

DILI, 13 agostu 2020 (TATOLI)-Primeiru-Ministru, Taur Matan Ruak, hateten prátikamente ezekusaun Orsamentu Jerál Estadu (OJE) 2020 ba fulan-rua de’it, hahú hosi novembru to’o dezembru, nune’e Governu sei la tau orsamentu barak.

“Ita sei la tau orsamentu barak, maibé ita haree oinsá mak atu kontinua nafatin atividade sira ne’ebé halo ona hanesan infraestutura no sira seluk tan atu kompleta de’it tinan ida ne’e,” tenik PM Taur hafoin enkontru semanál, iha Palásiu Prezidensiál, Bairro Pité, kinta ne’e.

Iha enkontru semanál ho Prezidente Repúblika, Francisco Guterres ‘Lú Olo’, Xefe Governu informa projesaun tetu finál ba Orsamentu Jerál Estadu (OJE) 2020, ne’ebé  Konsellu Ministru (KM) aprova ho montante millaun $1.492,3, maibé sei iha ajustamentu tanba ne’e posibilidade sei iha aumentu.

“Asuntu rua mak ohin koa’lia ho Prezidente Repúblika hanesan  tetu orsamentu  2020 nian no implementasaun Estadu Emerjénsia. OJE 2020 ein prisípiu ami prevee billaun $1,5, maibé sei halo ajustamentu hosi Ministériu Finansa (MF) to’o fulan ne’e ramata, hafoin Konsellu Ministru hasai desizaun ikus liu,” nia dehan.

Notísia Relevante: MF aprezenta projesaun tetu finál OJE 2020 ba KM

Antes ne’e, Ministru Finansa, Fernando Hanjam, informa OJE 2020 ne’e ministériu sira submete ona mai iha MF, maibé iha mós proposta adisionál millaun $300.

Nia dehan, proposta aumenta osan ne’e ekipa tékniku MF sei haree no analiza didi’ak proposta ne’e razoavel ka lae, tanba haree ba efetivu ezekusaun OJE 2020 ne’e ba fulan-rua de’it.

MF elabora  no aprezenta ona projesaun tetu finál ba KM tanba  projesaun rejime duodésimál to’o outubru de’it, hafoin novembru no dezembru sei tama orsamentu 2020.

Prioridade ne’ebé define ona iha OJE tinan ne’e,  maka estabilizasaun ba setór Sosiál ne’ebé foka ba saúde, edukasaun, formasaun, bee no saneamentu, estabilizasaun ba setór ekonómiku ho foka ba promosaun investimentu ba setór privadu, kriasaun ba empregu, agrikultura, no seguransa ai-han no polítika makro-ekonómiku, reforma ba administrasaun públika, ekonomia, sistema judisiáriu no jestaun ba finansa públika.

Bazeia ba prioridade hirak ne’e, porsentu 33,8 hosi valór totál OJE sei aplika ba setór sosiál, porsentu 8 ba edukasaun, porsentu 15 ba protesaun sosiál, porsentu 11 ba saúde no porsentu 48,5 ba dezenvolvimentu ekonómiku no infraestrutura inklui medida ba estabilizasaun ekonómika iha ámbitu COVID-19 nian.

Membru Governu sira aprova  ona kalendáriu preparasaun ba OJE 2020, ne’ebé sei diskute no aprova iha KM iha loron 26 agostu no sei submete ba Parlamentu Nasionál (PN) iha loron 15 setembru.

Enkuantu, kalendáriu OJE 2021 nian, prevee katak KM bele apresia Proposta Lei ne’e iha loron 25 setembru no sei submete ba PN iha loron 15 outubru.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here