Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos. Imajen Tatoli/Egas Cristovão

DILI, 13 agostu 2020 (TATOLI)-Primeiru-Ministru (PM), Taur Matan Ruak, konvoka reuniaun  koordenasaun ho ministériu relevante hodi diskute kona-ba asuntu sosiál, ba elaborasaun planu prioridade iha Orsamentu Jerál Estadu (OJE) 2021.

Membru Governu ne’ebé maka partisipa iha diskusaun ne’e maka hanesan Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, Ministra Saúde, Odete Maria Freitas Belo, Ministru Edukasaun, Juventude no Desportu, Armindo Maia no Ministru Ensinu Superiór, Siénsia no Kultura, Longuinhos Dos Santos.

“Ami enkontru ho Primeiru-Ministru kona-ba asuntu sosiál nian, oinsá atu haree prioridade ba 2021 nian,” relata Ministra Armanda Berta, hafoin enkontru ho Xefe Governu iha Palásiu Governu, kinta ne’e.

Vise PM ne’e hatutan, iha tinan fiskál 2021 ne’e sei tau prioridade ba rekuperasaun ekonómika nian, tanba ne’e setór sosiál sei bazeia ba proposta no rekomendasaun husi Komisaun Rekuperasaun Ekonómika.

“Ita haree filafali planu rekuperasaun ninian ne’ebé maka ekipa Komisaun Rekuperasaun Ekonómiku hato’o. Iha rekomendasaun oioin mak iha proposta ne’e, kona-ba asuntu sosiál nian ami haree hamutuk hodi implementa iha asuntu sosiál sira ne’ebé mak prioridade hanesan edukasaun, saúde, no sosiál nian rasik,” governante ne’e subliña.

Ministra Armanda dehan, kona-ba planu prioridade hosi ministériu sira sei tuur hamutuk hodi diskute no koordena di’ak liután nune’e bele imnplementa iha 2021.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here