Enkontru entre Ministru Asuntu Parlamentár no Komunikasaun Sosiál, Francisco Jerónimo, ho Embaixadór Portugal iha Timor-Leste, Pedro Vieira Machado, iha Gabinete MAPKOMS, Palásiu Governu, Palásiu Governu, kinta (13/08). Imajen/MAPKOMS

DILI, 13 agostu 2020 (TATOLI)–Embaixadór Portugal iha Timor-Leste, Pedro Vieira Machado, hasoru-malu ho Ministru Asuntu Parlamentár no Komunikasaun Sosiál (MAPKOMS), Francisco Jerónimo, hodi atualiza kooperasaun iha área komunikasaun sosiál.

“Nia mai komprimenta ha’u nu’udar ministru foun no atualiza kooperasaun ne’ebé la’o hela entre Governu Timor-Leste no Portugal iha área komunikasaun sosiál, ne’ebé durante ne’e Instituto Camões fó apoiu liuhosi formasaun jornalístika no lian portugés ba ita-nia jornalista sira hodi bele hakerek portugés ho di’ak,” tenik Ministru Francisco iha Palásiu Governu, kinta ne’e.

Governante ne’e nota katak, kooperasaun entre Governu rua iha área komunikasaun sosiál durante ne’e hatudu progresu pozitivu.

“Implementasaun kooperasaun  ne’e rasik la’o tinan rua ona no sei iha ninia kontinuasaun, tanba liuhosi kooperasaun ne’e iha ona timor-oan balun maka parte Instituto Camões rekruta ona hodi sai formadór portugés,” nia apresia.

Ministru Francisco Jerónimo konsidera kooperasaun ne’e hatudu avansu pozitivu tanba notísia sira iha mídia balun hahú hakerek ho lian portugés ho di’ak.

“Ita haree kestaun ida avansu ona hanesan iha Timor Post ohin loron uza portugés, nune’e mós iha Agência Noticiosa Tatoli, harekek ona mós iha lian portugés inklui mídia seluk ne’ebé maka barak komesa hakerek ho portugés hanesan Rádiu Televizaun Timor-Leste (RTTL) ne’ebé notísia balun ho portugés. Ne’e hotu rezultadu hosi koooperasaun ne’ebé iha,” nia haktuir.

Iha fatin hanesan, Embaixadór Pedro Vieira Machado, apresia enkontru ne’e tanba bele fahe informasaun importante balun iha área komunikasaun sosiál, nune’e mós hanesan enkontru dahuluk hafoin Ministru Francisco asume knaar nu’udar membru Governu.

“Ami-nia konversa pozitivu tebes. Ha’u informa ba Ministru kona-ba koopersaun ne’ebé Governu rua halo ona, espesífikamente iha área komunikasaun sosiál nian liuhosi projetu Consultório da Língua para Jornalista (CLJ), ne’ebé hatudu progresu di’ak,” nia relata.

Diplomata ne’e observa katak, kooperasaun ne’e hatudu progresu pozitivu tanba formasaun  durante ne’e foka ba área tékniku  jornalizmu tuir nesesidade, nune’e profisionál iha komunikasaun sosiál sira bele benefísia hodi implementa iha serbisu loron-loron.

“Kooperasaun ne’e iha ona faze finál entre Governu Portugal no Timor-Leste, maibé ami sei kontinua kooperasaun liuhosi projetu  CLJ hodi bele implementa tan  ba tinan datoluk nian,” Embaixadór ne’e informa.

Biban ne’e, parte rua mós ko’alia kona-ba impaktu pandemia COVID-19, ne’ebé halo profesór portugés sira seidauk bele mai Timor-Leste hodi fó asisténsia iha parte lian portugés, espesiál iha área komunikasaun sosiál.

Iha loron 28 maiu 2020, Governu liuhosi Sekretaria Estadu Komunikasaun Sosiál (SEKOMS) no Instituto Camões liuhosi Embaixada Portugal selebra akordu ba prolongasaun projetu CLJ to’o 31 dezembru 2020.

Benefisiáriu ba projetu CLJ dezde hahú iha 2016 to’o dezembru 2019 hamutuk 190 no hosi númeru ne’e na’in-40 hanesan profisionál sira ne’ebé servisu iha Governu no na’in-150 hanesan jornalista.

Enkuantu, jornalista sira ne’ebé iha ona melloramentu ba lian portugés husi projetu CLJ iha 2016 to’o 2019 hamutuk 211 no profisionál husi instituisaun Governu hamutuk 57.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here