Grupu deskoñesidu halo asaltu no sunu motuk komunidade sira-nia uma-12 iha Aldeia Uasilawa, Suku Nunira, Postu Administrativu Laga, Munisípiu Baucau. Imajen/Foti husi Facebook

DILI, 13 agostu 2020 (TATOLI)- Komunidade Aldeia Uasilawa, Suku Nunira, Postu Administrativu Laga, Munisípiu Baucau, kinta madrugada, purvolta tuku 04:00 Otl, hakfodak, ta’uk no trauma, ho akontesimentu ne’ebé grupu deskoñesidu halo asaltu ba sira nia knua-laran.

Motor ida ne’ebé hetan sunu mós iha kazu asaltu husi grupu deskoñesidu iha Aldeia Uasilawa, Suku Nunira, Postu Administrativu Laga, Munisípiu Baucau. Imajen/Facebook

Husi asaltu ne’e, rezulta uma abitante Nunira nian hamutuk 12 hetan sunu, motor yamaha vixion ida no baku rahun karreta baskulante ida.

Xefe Aldeia Uasilawa, Alberto Pinto Ribeiro, informa, kronolojia husi kazu ne’e akontese ligadu ho kazu sona vítima Leonel Freitas ne’ebé akontese Baucau Vila Nova, maka hada’et too problema sunu uma populasaun nian.

“Uma 12 maka ema sunu, no iha uma laran sasán la salva, ema sunu motuk uma too dapur ne’ebé organiza husi grupu balun ne’ebé iha relasaun ho arte marsiál (deskoñesidu) hodi sunu mós motór ida, baku rahun karreta ida no baku kanek joven na’in-rua,” hateten Xefe Aldeia Alberto Pinto, ba jornalista via telefone, ohin.

Nia dehan, asaun atake ka asaltu husi  grupu ho karakter asasinatu ne’e halo populasaun sira trauma tebes, tanba grupu halo planu antes maka taka.

“Grupu sira ne’e mai ho hosi Aldeia Busucau-Loilacu mak mai halo asaltu hodi sunu uma iha Aldeia Uasilawa,” informa Xefe Aldeia ne’e.

Nia informa, hafoin akontesimentu, parte autoridade koordena ho parte PNTL too kedas iha fatin hodi salva populasaun hodi evakua ba Eskuadra PNTL Laga.

Daudaun ne’e sitasaun iha terrenu sei kontinua manas, tanba populasaun sira trauma grupu deskoñesidu ne’e ameasa sei kontinua halo asaltu ba populasaun sira.

Iha parte seluk, portavós Komandu Jerál PNTL, Superintendente Xefe Arnaldo Araújo, rekoñese grupu organizasaun arte marsiál balun maka halo atake hodi sumu komunidade sira-nia uma.

Nia dehan, parte Komandu PNTL Munisípiu Baucau ne’ebé lidera husi Superintendente Xefe, Armando Monteiro ho ekipa PNTL, F-FDTL, Bombeiru no autoridade suku daudaun ne’e  halo ona atuasaun hodi salva vítima sira, inklui fó orientasaun ba PNTL buka tuir suspeitu sira.

“Agora daudaun ita nia PNTL halo ona atuasaun iha terrenu, tanba ne’e ami hein hela relatóriu investigasaun husi Komandante PNTL Baucau,” hateten portavós PNTL, Arnaldo  Araújo, ba jornalista iha Kuartél Jerál PNTL.

PNTL Baucau mós hetan apoiu husi Batallaun Orden Públiku (BOP) too ona terrenu hodi akalma situasaun.

Iha parte seluk, Komandante PNTL Munisípiu Baucau Superintendente Xefe, Armando Monteiro ne’ebé halo operasaun iha terrenu orienta kedas ekipa Servisu Investigasaun Kriminál (SIK) Baucau hodi rekolla dadus husi autoridade suku no sasin sira hodi fó deklarasaun ba polísia para buka tuir autór.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here