Prezidenti Tribunal Rekursu, Deolindo dos Santos. Imajen/Antonio Goncalves

DILI, 12 agostu 2020 (TATOLI)-Iha proposta Orsamentu Jerál Estadu (OJE) tinan 2021, Tribunál Rekursu (TR) tau ona prioridade atu loke tan Tribunál Distritál iha Munisípiu tolu, hanesan Viqueque, Ermera no Bobonaro.

Prezidente Tribunál Rekursu (PTR), Deolindo dos Santos, ohin, informa, planu alargamentu hodi loke tan Tribunál judisiál ne’e atu lori justisa hakbesik ba povu sira ho forma ne’ebé permanente. Nune’e, bele  redús kustu orsamentu  operasionál ne’ebé durante ne’e  gasta ka uza ba iha funsionamentu Tribunál movel ne’ebé kustu boot tebes.

Nia hatutan, Tribunál movel ne’ebé daudaun ne’e kontinua la’o ho forma ne’ebé iha labele para tanba ho forma ne’e mak lori justisa  besik ba   komunidade no bele halo justisa ne’ebé lais liután  maibé ho temporáriu

“Iha solusaun  ne’ebé mak permanente ba kestaun ne’e, ami iha ona planu hodi identifika ona atu loke tan Tribunál iha munisípiu  tolu,”  informa  Deolindo dos Santos, ba jornalista hafoin enkontru ho Primeiru-Ministru Taur Matan Ruak, iha Palaçio do Governo.

Razaun TR  hili fatin  munisípiu tolu ne’e tanba iha ona delegasaun Ministériu Públiku  (MP) no Defensór Públiku nune’e bele fasilita servisu ne’e no razaun seluk mak haree ba estatístika prosesu kazu ne’ebé iha munisípiu tolu rejista ho númeru aas.

Nia hateten, iha probabilidade mós ba Munisípiu Manufahi, maibé sei prioridade uluk ba munisípiu tolu  ne’e.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here