Ministru Asuntu Parlamentár no Komunikasaun Sosiál, Francisco Jerónimo, dada-lia ho Dirijente mídia online Talitakum, iha edifísiu Farol, kuarta (12/08). Imajen/ Natalino Costa

DILI, 12 agostu 2020 (TATOLI)-Iha vizita ba mídia online Talitakum, Ministru Asuntu Parlamentár no Komunikasaun Sosiál (MAPKOMS), Francisco Jerónimo, enkoranja mídia foun ne’e atubele kontinua misaun ba oin.

“Talitakum foin maka harii no sira foin hahú, ha’u enkoraja sira atu kontinua misaun ne’ebé sira hakarak atu nune’e sai mídia online ne’ebé iha kualidade di’ak, tanba  sira-nia karaktér ne’e haree liu ba atividade ekonómika no atividade polítika kle’an liu, entaun ha’u husu sira kontinua mantein no la’o di’ak nafatin,” tenik Ministru Francisco, ba Agência Tatoli, iha Farol, kuarta ne’e.

Iha fatin hanesan, Diretór mídia online Talitakum, Altide Santos, konsidera vizita MAPKOMS ba Talitakum nu’udar vizita dahuluk hafoin lansa mídia ne’e no bele fanu Talitakum hakat ba oin nu’udar mídia independente ida.

“Agora ami esforsu atu ba rejistu iha Servisu Rejistu Verifikasaun Emprezariál (SERVE) atu hetan legalidaade,” informa Dirijente mídia ne’e.

Altide dehan, Talitakum nu’udar mídia online ne’ebé maka foin daudaun maka lansa maibé iha ona mehi boot atu sai jornál semanál hanesan uluk mídia ne’e eziste fofoun iha tempu Indonézia.

“Ami sei haree bainhira Talitakum iha progresu di’ak, entaun filafali hanesan tempu sai jornál semanál,” nia akresenta.

Jornál semanál Talitakum harii iha 24 abríl 1998, hafoin referendum 30 agostu 1999 jornál ne’e la halo atividade no deside para.

Ho nune’e, iha loron 20  juñu 2020, Talitakum hahú ninian ezisténsia liuhosi plataforma online www.talitakum.tl, ho publikasaun fulan ida dala ida.

Vizita MAPKOMS ba Rádiu Lorico Lian

Iha loron hanesan, Ministru Francisco halo mós vizita ba Rádiu Lorico Lian, nu’udar kompromisu Governu atu hametin kooperasaun ho mídia sira.

“Hanesan ha’u vizita ne’ebé ha’u halo ba mídia seluk antes ne’e, atu atu fó mensajen katak Governu nafatin hakarak halo kooperasaun ho mídia hotu,” dehan governante ne’e ba Agência Tatoli, hafoin halo vizita ba Rádiu Lorico Lian, iha Farol, kuarta ne’e.

Tuir Ministru, vizita ne’e atu enkoraja rádiu ne’e atubele funsiona di’ak liután no mós halo kontaktu ho Governu hodi haree fasilidade saida bele apoia.

“Rádiu ne’e nu’udar rádiu komunidade naun lukrutivu, entaun Governu iha devér tomak fó apoiu ba sira,” nia akresenta.

Iha fatin hanesan, Diretór Rádiu Lorico Lian, Prezado Ximenes, konsidera vizita Ministru Francisco nu’udar oportunidade di’ak atubele hato’o difikuldade durante halo serbisu loron-loron.

Nia mós apresia prezensa MAPKOMS hodi bele motiva mídia sira.

“Ha’u kontente tebes ho prezensa Ministru no karik bele kontinua vizita ne’e, nune’e bele  enkoraja no apoia mídia sira atu halo serbisu ho di’ak liután,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here