Jogador AS Ponta Leste Daniel Donkor.

DILI, 12 agostu 2020 (TATOLI)-Jogadór husi Nasaun Gana, Daniel Donkor, iha tinan ne’e sei la hamutuk ho Jogadór Nasionál Klube AS Ponta Leste ninian hodi kompete iha Kopa Federasaun Futeból Timor-Leste.

Klube hamutuk 20 maka daudaun ne’e rejistu ona atu kompete iha eventu ne’ebé tuir orariu sei abertura iha loron 20 fulan-agostu iha Estádiu Dili.

Treinadór Prinsipál AS Ponta Leste, Eduardo Pereira, hateten jogadór metan ho kamijola 20, oras ne’e sei iha hela ninia nasaun no labele fila mai Timor-Leste tanba akontese pandemia globál COVID-19.

Notísia Relevante :Klube 20 sei kompete iha kopa FFTL

“Daniel Donkor sei lá reforsa Ponta Leste iha kopa FFTL tanba agora nia iha hela estranjeiru. Haree ba COVID-19 nia sei labele mai,” Nia hateten ba Tatoli iha Kampu FFTL Bairru Formosa Dili, tersa ne’e.

Jogadór Estranjeiru ne’e informa ona ba klube katak iha vontade no hakarak fila lalais mai territóriu hodi reforsa ninia kolega jogadór seluk iha eventu nasionál ne’e.

“Nia husu hela atu mai maibé ladi’ak, ita mak haree de’it situasaun agora karik posibilidade iha LFA (Liga Futeból Amadora) époka ida ne’e nia bele mai, ami ho manajementu klube sei simu nia hodi reforsa klube,” tenik tan.

Notísia Relevante :FFTL Realiza Kopa 2020 ho Osan Rihun $ 200

Durante joga iha époka sira ba kotuk, Jogadór Gana ne’e marka ona golu ba klube AS Ponta Leste hamutuk 20-resin. Prestasaun lubuk ida maka Daniel Donkor kontribui ona ba dezenvolvimentu klube nian.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here