Deputada CNRT, Carmelita Caetano Moniz. Imajen/dok.TATOLI

DILI, 12 agostu 2020 (TATOLI)—Bankada Congresso Nacional da Reconstrução de Timor (CNRT) kestiona Ministru Finansa (MF), Fernando Hanjam, poupa osan fundu COVID-19.

Notísia Relevante: Governu ezekuta ona fundu COVID-19 pursentu 54

Membru  Bankada CNRT, Deputada Carmelita Caetano Monis, esplika Parlamentu Nasionál aprova pedidu levantamentu dahuluk no daruak hamutuk millaun $220 maibé kapasidade Governu nian mak sai kestaun.

“Ita aprova orsamentu ba COVID-19 millaun $150 mais millaun $70, ne’e hamutuk millaun $220 foin ezekuta 54%. Ministru Finansa dehan fali sei saldo tanba iha poupansa. Saldo la’ós poupansa señor Ministru. Saldo ne’e tanba kapasidade ezekusaun mak laiha, ita tau osan tuir programa ne’ebé mak ita iha,”  Deputada Carmelita Caetano Moniz, kestiona liuhosi plenária estraordinária, tersa ne’e.

Eis Prezidente Komisaun A (Justisa no Konstitusionál) ne’e fó ezempleu, se tau millaun $100 gasta de’it $500 mill signifika kapasidade ne’e la tuir programa ne’ebé mak iha.

Entretantu, membru Bankada FRETILIN, Deputadu David Dias Ximenes “Mandati”, husu Governu nia atuasaun tenke emerjénsia tanba Parlamentu Nasionál aprova ho karáter urjénsia.

“Ita anunsia buat ida Estadu Emerjénsia ho termu emerjénsia. Karik bele, ita-nia atuasaun mós emerjénsia para responde situasaun ida-ne’e. Ohin, maluk balun ko’alia ezekusaun orsamentál emerjénsia ninian oinsá, oinsá mak ita bele ezekuta ida-ne’e. Ha’u mós hatene difikuldade ne’e barak. Ne’eduni, buka mekanizmu no forma hodi atende situasaun emerjénsia ida-ne’e,” Deputadu Mandati fó hanoin.

Iha 25 marsu 2020 Parlamentu Nasionál (PN) aprova pedidu ho karáter urjénsia ba proposta levantamentu hodi fó autorizasaun Governu foti millaun $250 hosi fundu petrolíferu. Hosi millaun $250 ne’e millaun $100 reforsa kaixa tezouru no millaun $150 preve ba fundu COVID-19.

Entretantu pedidu levantamentu estraordinária daruak hamutuk millaun $286.3. Hosi montante orsamentu ne’e prevé millaun $70 ba fundu COVID-19.

Hatán ba kestaun ne’e, Ministru Finansa, Fernando Hanjam, hateten ezekusaun orsamentu relasaun ho fundu COVID-19 nian to’o loron tersa ne’e ezekuta ona 54% hosi levantamentu estraordinária dahuluk no daruak nian.

Nia argumenta, durante ne’e Ministériu Finansa halo avaliasaun ba ministériu sira-ne’ebé la konsege implementa fundu COVID-19 ne’e liuhosi avaliasaun konsege poupa orsamentu balun.

“Orsamentu sira-ne’e ita tenta halo poupansa no ita hetan kuaze millaun $30, agora relasaun ho pagamentu ba subsídiu ba funsionáriu sira hanesan PNTL no F-FDTL ita finaliza ona maibé sei tama tán proposta balun nune’e ita bele halo pagamentu kona-ba subsídiu remuneratóriu ne’e,” Ministru Finansa, Fernando Hanjam hateten.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here