Abitante sira ne’ebé tama mai Timor-Leste husi nasaun afetadu COVID-19 kumpre konfinamentu obrigatóriu durante loron-14. Imajen/Dok.Tatoli

DILI, 11 agostu 2020 (TATOLI)- Ministériu Saúde liuhusi Ekipa Pilar III COVID-19 rekoñese desizaun Prezidente Repúblika, Francisco Guterres “Lú Olo” hodi veta Dekretu-Lei Rejime Jurídiku Vijilánsia Epidemiolojia no Sanitária, afeta ba servisu Ministériu Saúde tanba labele obriga sidadaun sira ne’ebé hala’o viajen mai husi nasaun afetadu COVID-19 atu kumpre konfinamentu obrigatóriu ka hela iha fatin kuarentena ne’ebé governu Timor-Leste prepara ona.

Notísia Relevante : Prezidente Repúblika Veta Dekretu-Lei Rejime Jurídiku Vizilánsia Epidemiolójika no Sanitária

Koordenadór Pilar III COVID-19 Ministériu Saúde, Doutora Josefina Clarina João dehan, hafoin Prezidente Repúblika veta lei ne’e,  ekipa Ministériu Saúde labele obriga sidadaun sira atu hela iha fatin kuarentena. Mezmu nune’e, ekipa Ministériu Saúde halo nafatin esforsu uza lei Organizasaun Mundiál Saúde  (OMS) hodi obriga sidadaun estranjeiru ka Timoroan mai husi rai-li’ur obrigatóriu tenke hela iha fatin kuarentena.

“Ami nia preokupasaun maka ita nia na’i prezidente veta tiha ita nia lei ba Lei Rejime Jurídiku Vijilánsia Epidemiolojia no Sanitária, ida ne’e bele difikulta ba iha ami nia servisu, tanba bainhira ami haruka ema ida ba kuarentena, nia bele husu fali, lei ida ne’ebé maka tenke obriga ami ba kuarentena? Maibé, ami koko atu esplika liu husi rezolusaun sanitária internasionál iha 2005 ne’ebé permite nasaun membru husi Organizasaun Mundiál Saúde  (OMS) atu aplika medida intervensaun hotu durante emerjénsia saúde públika,” Josefina Clarina João hateten liuhusi nia intervensaun durante hala’o enkontru koordenasaun ho Prezidente Autoridade Munisípiu Dili, ekipa liña Ministériu Saúde no PNTL, ohin, iha salaun enkontru Sentru Saúde Vera Krús, Dili.

Nia hatutan, preokupasaun seluk tan maka, ema sira ne’ebé hela iha kuarentena fasil atu halo kontrolu ba sira-nia saúde, maibé ba sidadaun sira ne’ebé hetan karta rekomendasaun saúde hodi hela iha auto kuarentena (hela iha uma) ne’e difisil tebes atu halo kontrola.

“Preokupasaun boot ida ba ami Pilar III maka haree ba auto kuarentena, ita agora iha 143 auto kuarentena iha Dili, Don Aleixo iha 80, Nain Feto iha 20, Kristu Rei iha 19 no Vera Krús iha 24. Tanba saida maka ha’u dehan preokupasaun boot ba sira ne’e, tanba se ema tama kuarentena ida nia médiku bele halo kontrolu,  maibé sira ne’ebé iha auto kuarentena ita labele halo kontrolu ba sira oras 24 nia laran atu vizita sira, tanba ita la hatene sira sai ba fatin ruma, tanba ema sira iha auto kuarentena ne’e maioria ema businessmen dala ruma nia ansi demais ona atu implementa nia servisu nia bolu nia parseiru bele halo ita ulun moras, tanba preokupasaun sira ne’e mosu tanba ita la iha lei ida atu aplika kuarentena ba ema hotu,” nia preokupa.

Nia hatutan, uluk aplika EE primeiru too EE terseiru sira autoriza ema bele iha uma, maibé agora ekipa Ministériu Saúde sei ba halo kontrolu uluk ema nia hela fatin foin bele fó autorizasaun hodi hela auto kuarentena no uma moru hale’u ka otél livre hodi sirkulasaun ka movimentu sidadaun ka ema barak.

Nia hatutan, Ministériu Saúde presiza halo implementa nafatin programa vijilánsia sentinela hodi kontrola saúde públiku.

 Monta seguransa

Iha parte seluk, Koordenadór Pilar III COVID-19 Ministériu Saúde, Doutora Josefina hosu ba Komandu PNTL Munisípiu Dili atu hahú monta fali seguransa iha fatin kuarentena 15 ne’ebé estabelese ona iha Dili.

Nia dehan, PNTL presiza monta seguransa hodi kontrola sidadaun sira ne’ebé hela iha fatin kuarentena durante loron 14 labele halo kontaktu ho família.

Daudaun ne’e Ministériu Saúde halo ona kontratu ho otél 15 iha kapitál Dili hanesan Luz Clartita, Novu Horizonte, Hotel Audian, Hotel Colmera, Otel Luxuri, Otél Viana, Otél Fantiza, Leokase,  Tasi Tolu no Tibar.

Responde ba preokupasaun ne’e, Segundu Komandante PNTL Munisípiu Dili, Superindente Euclides Belo deklara, sira-nia parte prontu kolokka membru hodi halo seguransa ba fatin kuarentena sira ne’ebé estabelese ona.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here