Logotipu Tribunál Distritál

DILI, 11 agostu 2020 (TATOLI)-Tribunál Distritál Dili (TDD) liuhusi desizaun final kondena  arguidu Mário Pereira da Costa ho pena prizaun efetivu tinan-tolu (3)  husi kazu maus tratu inkapás tanba sulan nia aman rasik ho inisiál CC iha  gaiola ka besi-laran.

Notísia Relevante : Sulan Aman Rasik iha Besi-Laran, MP Alega Pena Prizaun Tinan-Ualu

Iha leitura desizaun, Juiz João Ribeiro hateten, liuhusi produsaun prova iha julgamentu sira liu ba ho faktu ne’ebé arrola husi Ministériu Públiku katak provadu arguidu sulan lezadu iha gaiola ka besi-laran durante fulan-ida resin  ho kondisaun ne’ebé la fó espasu ba lezadu atu book-an.   Nune’e, halo lezadu toba de’it iha besi-leten  hamutuk no nia fo’er sira.

Kazu maus tratu inkapás ne’e akontese  iha Bairru-Pité, Dili, iha  janeiru liu ba no iha julgamentu mezmu  arguidu rasik deklara katak, lezadu nu’udar nia-aman rasik ho kondisaun violentu, maibé  Tribunál la konsidera tanba sasin husi médiku nian hatudu, lezadu la’ós ema violentu, maibé lezadu sofre moras mental hanaran BIPOLAR.

Ho nune’e  Tribunál deside aplika pena prizaun efetivu tinan-tolu (3) ba arguidu Mário Pereira da Costa, tuir artigu 153 kona- ba maus tratu ba inkapás, númeru 1 Kódigu Penál Timor-Leste.

Antes ne’e Ministériu Públiku  (MP) nia akuzasaun akuza arguidu  ho krime-tolu (3) hanesan espozisaun ka abandonu ne’ebé previstu iha artigu 143 númeru 1 alínea A, maus tratu ba inkapás ne’ebé previstu iha artigu 153 no raptu previstu iha artigu 161 hotu-hotu husi kódigu penál Timor-Leste. Maibé, Tribunál altera tiha  krime  artigu 143 kona-ba espozisaun ka abandonu no artigu 161 raptu, ho razaun tanba artigu rua ne’e la prienxe rekizitu natureza krime ne’ebé arguidu komete, tanba arguidu bele sulan nia aman, maibé nia nafatin fó han no fó hemu.

Ministériu Públiku  liuhusi Prokuradór Jacinto Babo, la konkorda ho desizaun Tribunál nian ho alterasaun ba artigu rua ne’ebé antes ne’e MP  akuza ba arguidu. Nune’e durante loron-15 nia laran, (sura husi akórdaun Tribunál primeira instánsia nian) MP sei halo rekursu.

Julgamentu ne’e arguidu hetan asisténsia legál husi advogadu privadu Agostinha Mendonça.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here